Romët boshnjakë: Shtëpi të reja, ndjenja të përziera
Në Kakanjin boshnjak, në një vend, ku dikur depozitoheshin mbetjet do të ngrihen një sërë pallatesh banimi për romët. Një projekt i financuar nga BE e mundëson këtë, por jo të gjithë janë gati të largohen nga barakat.
Ditë feste në Kakanje
Ky banor i Kakanjës me krenari mban flamurin boshnjak. Në kuadër të projektit të BE "Roma Action II" do të inagurohet një pallat i ri, i dyti nga dhjetë pallate për 68 familje rome në veri të Sarajevës. Hapësirë banimi për njerëzit që kanë jetuar në baraka.
Pallate në vend të plehrave
Aty ku sot sheh shtëpi të reja, para pak muajsh depozitoheshin mbeturinat. Këtu jetonin familje rome që do të hyjnë në shtëpitë e reja. 300 tonë mbetje të rrezikshme janë eliminuar. Ato shihen si shkas që shumë fëmijë romë të zonës kanë probleme me shikimin.
Pritje me durim
Familja Ramiç (përpara me fëmijë) është një nga tetë familjet që do të marrë apartament të ri. Shtatë muaj kaluan nga prishja e barakave deri tek pallati i ri. Këtë kohë familja e kaloi tek të afërmit, në një barakë pa ujë të pijshëm dhe rrymë elektrike.
Fillim i ri
Nermin Mandra, kryetari i bashkisë së Kakanjit i dorëzon kryefamiljarit Smail Ramiçit kontratën e qirasë dhe çelësin e apartamentit me tre dhoma, luks për familjen tetëanëtarëshe, krahasuar me jetën e mëparshme. Por me prishjen e depozitës, Smail Ramiç ka humbur vendin e punës. Ai ndante dhe mblidhte plehrat në vendin e depozitimit.
Ende të habitur brenda shtëpisë së re
Pas ceremonisë familja Ramiç do të marrë batanijet, më shumë se kaq ata nuk kanë. Në dhomat bosh mungojnë mobiljet. Nëna, Dula Smaka dhe babai, Smaili jetojnë me pesë fëmijë, vajzën e madhe dhe foshnjen e saj. Të gjithë të papunë.
Pallate moderne
Kakanje është një nga nëntë komunat e Bosnje--Hercegovinës, ku ndërtohen 140 apartamente. 2,5 milionë euro mbështetje e BE-së, 327.000 euro nga komunat. Ky është vetëm fillimi. Planifikohet edhe një qendër kulturore dhe bursa për fëmijët romë.
Ka edhe të pakënaqur...
Jo të gjithë janë të lumtur me pallatet e rinj...ka edhe kundërshtime, sepse për të ndërtuar pallatet e reja duhej të prisheshin ndërtimet e vjetra. Banorët e këtyre barakave duhet të largohen, por ata nuk mendojnë se është një shkëmbim i mirë marrja e një apartamenti të ri.
Gjyshja Sejdiç nuk do të largohet
Vahida Sejdiç ka jetuar e punuar për afër 50 vjet pranë Shtutgartit. Tani ajo jeton në Kakanje në një shtëpi dy dhomëshe të ndërtuar nga babai. Me 680 euro pension ajo mund të jetojë mirë në Bosnje, prandaj as nuk do të lëvizë nga shtëpia. Por vendimi për prishjen e ndërtesave është marrë.