Putini autorizon urën e Krimesë për trenat

"Pojechali" - "Le të nisemi", tha ai. Me punëtorët ai më pas piu çaj në një vagon, në kohën kur treni ecte mbi urën 19 kilometra të gjatë. Rusia e aneksoi Krimesë, pjesë e Ukrainës, megjithë protestat ndërkombëtare, në vitin 2014.

Kreu i Kremlinit hipi në tren në Kerç në Krime dhe mbërriti pak më vonë në gadishullin rus Taman. "Kjo është një ngjarje e madhe," tha Putini në stacionin e trenit. Miliona njerëz sipas tij do të vijnë në Krime në këtë mënyrë në të ardhmen.

Ndërtimi zgjati katër vjet

Pjesën e autostradës të urës së diskutueshme Putini e hapi që vitin e kaluar. Pas më shumë se katër vjetësh ndërtimi në shina tani po ecin trenat e parë nga metropolet ruse drejt gadishullit. Televizioni tregoi nisjen e trenit nga Shën Petersburgu, kur në tren hipën 530 pasagjerët e parë. Ata pritet të mbërrijnë në Krime natën e së mërkurës.

Ukraina, së cilës sipas së drejtës ndërkombëtare i përket Krimeja, protestoi te BE dhe te SHBA kundër urës. Ura e gjatë prej 19 kilometrash në ngushticën e Kerçit - midis Detit të Zi dhe Detit Azov - është më e gjata në Rusi dhe në Evropë. Ajo ka kushtuar rreth 228 miliardë rubla (3,3 miliardë euro).

ni/ml (dpa, afp)