Premtime për nënshtetësi greke për fëmijët e imigrantëve të lindur në Greqi

Imigrantët ishin padyshim nga teleshikuesit më të interesuar të konferencës për shtyp të kreut të socialistëve greke Jorgos Papandreu në Selanik, ku shpalli edhe programin e partisë së tij, që nga një pjesë e shtypit u cilësua si “recetë Obama” për Greqinë. Një prononcim edhe për ata kësaj radhe do të kishte rëndësinë e tij të veçantë pasi Papandreu dhe partia e tij, PASOK-u, sipas të gjitha anketimeve do të jenë fituesit e zgjedhjeve të katër tetorit, bile edhe me shumicë absolute.

I pyetur nëse do t'i jap fund diskriminimit racist duke u ofruar nënshtetësinë greke fëmijëve të imigrantëve të lindur në Greqi, Papandreu ishte i qartë. “Fëmijë që lindin dhe rriten në Greqi, nuk kanë atdhe tjetër dhe ndjehen grekë, pavarësisht nga origjina e tyre duhet të kenë të drejtën të marrin nënshtetësinë greke,” u përgjigj Papandreu, i cili theksoi edhe një herë nevojën e integrimit të imigracionit në kulturën greke, në Greqi, në shoqërinë greke,” sikurse tha shprehimisht. Edhe një herë kreu i socialistëve grekë përmendi shembullin e tij personal -që fati e deshi në një periudhë të jetës së tij të endet edhe ai si imigrant në vende të tjera- si një tjetër argument i politikës dhe vizionit të tij mbi imigracionin dhe të ardhmen e tij: “Edhe unë kam qenë imigrant edhe e di se çdo të thotë një shoqëri e së drejtës dhe si e trajton imigrantin,” tha Papandreu si një tjetër shembull i ndryshimit të premtuar për vendin.

Rreth 250 000 fëmijë të imigrantëve të lindur në Greqi -shumica e tyre shqiptarë- mbeten të paregjistruar dhe pa asnjë dokument të ligjshëm qëndrimi. Ky “paradoks”, siç përcillet ndryshe, që kompomenton edhe imazhin evropian të Greqisë, ka bërë që socialistët në programin e tyre të premtojnë nënshtetësinë greke jo vetëm për fëmijët e lindur në Greqi por, edhe për ata fëmijë që kanë ardhur së bashku me prindërit e tyre dhe kanë bërë të paktën 3 vjet shkollë në vend.

“Duam që fëmijët të jenë të integruar dhe të lumtur në vendin ku lindën dhe jetojnë. Është rruga më e mirë për paqen sociale të të gjithëve,” i thotë Deutsche Welles Marilena Kopa, eurodeputete dhe një nga kuadrot më në zë të PASOK-ut.

Papandreu e di se në këtë çështje nuk ka konsensusin e të gjithë shoqërisë greke. Nacionalistët e Alarmit Ortodoks Popullor por edhe një pjesë e opinionit konservator nuk duan të dëgjojnë për një rregullim të tillë. E akuzojnë se tjetërson popullsinë e vendit. 61 përqind e grekëve, sipas Eurobarometrit të fundit, i shikon negativisht imigrantët. Me imigrantët pa të drejtë vote, Papandreu me këtë pozicionim të tij deshi të kalojë mesazhin se “bën politikë dhe jo pazar votash”.

Autor : Niko Anagnosti

Redaktoi : Aida Cama