Papa duhet të qëndrojë më gjatë në spital

Sipas Vatikanit, Papa Françesku vuan nga një gjendje klinike "komplekse”. Analizat kanë treguar një "infeksion polimikrobial të traktit respirator”. Me këtë, mjekët nënkuptojnë se komunitetet bakteriale, që janë të vështira për t'u trajtuar, janë zhvilluar në mushkëri.

Ndryshim i trajtimit, qëndrim më i gjatë në spital

Diagnoza çoi në një ndryshim të ri në trajtim, shpjegoi Vatikani. 88-vjeçari, i cili u shtrua në spitalin Gemelli të Romës të premten me bronkit, duhet të qëndrojë në spital. Trajtimi i tij u desh të modifikohej tashmë të shtunën.

Nuk u dha asnjë afat kohor për shtrimin e tij në spital, por kompleksiteti i simptomave të tij "do të kërkojë një qëndrim të përshtatshëm në spital". Mjekët e urdhëruan të pushonte plotësisht. Papa prej javësh vuan nga probleme të frymëmarrjes dhe një kollë.

Pas një "nate të qetë"

Audienca e përgjithshme e Papës të mërkurën u anulua. Vatikani nuk pranoi të komentojë mbi pneumoninë ose një përkeqësim të përgjithshëm të gjendjes së tij. Papa ishte në humor të mirë, tha zëdhënësi Matteo Bruni para gazetarëve në sallën e shtypit të Vatikanit.

Bruni kishte raportuar më parë se Françesku kishte fjetur mirë dhe kishte kaluar një natë të qetë. Ashtu si të dielën, Papa hëngri mëngjes dhe lexoi disa gazeta. Trajtimet mjekësore do të vazhdojnë.

Papa i dytë më i moshuar në histori

Françeskut i mungon një pjesë e mushkërisë së djathtë që nga një operacion në moshë të re. Në moshën 88-vjeçare, ai është Papa i dytë më i vjetër në histori. Pasardhësi i Benediktit XVI, ai ka mbajtur detyrën që nga marsi 2013.

Prej disa kohësh ishte e qartë se shëndeti i tij po rëndohej. Zëri iu ndërpre disa herë gjatë daljeve publike. Ai pothuajse nuk është larguar nga rezidenca e tij në Vatikan. Ky është shtrimi i katërt i Françeskut në spital që nga zgjedhja e tij në krye të komunitetit global katolik. Françesku është kreu i 1.4 miliardë katolikëve në mbarë botën.

aud (dw, tgs)