Obama - Südkorea
25 Mars 2012Presidenti amerikan Barack Obama në hapje të vizitës së tij në Korenë e Jugut ka vizituar zonën e çmilitarizuar në kufirin me Korenë e Veriut. Shtetet e Bashkuara kanë të stacionuar në këtë zonë gati 30.000 ushtarë. Në përfundim të vizitës këtu është planifikuar një takim me kreun e shtetit koreanojugor, Lee Myung Bak.
Në qendër të vizitës së tij është pjesëmarrja ne samitin e dytë botëror për sigurinë e armëve bërthamore, që zhvillohet të hënën dhe të martën në kryeqytetin Seul. Aty do të konsultohen përfaqësuesit nga më shumë se 50 shtete lidhur me evitimin e mundësive të armatosjes së terroristëve me armë bërthamore.
Takimi për sigurinë e armëve bërthamore
Më parë Koreja e Veriut paralajmëroi Seulin se një rezolutë e mundshme në takimin, që nis të hënën lidhur me programin bërthamor të vendit do të shihet si një provokacion, që konsiderohet “akt lufte”. Pheniani e dënoi takimin e Seulit si një “krim të pafalshëm” dhe një “provokim të rëndë e të patolerueshëm”.
Nga Gjermania do të jetë i pranishëm ministri i jashtëm Guido Westerwelle. Obama do të zhvillojë bisedime dypalëshe edhe me disa udhëheqës botërorë. Ndër takimet e planifikuara është ai me presidentin kinez, Hu Jintao, si dhe udhëheqësit e Kazakistanit, Rusisë, Koresë së Jugut dhe Turqisë. Presidenti amerikan do të të takohet edhe me kryeministrin e Pakistanit, Yousuf Raza Gilani.
Autor: dpa/Mimoza Kelmendi
Redaktoi: Angelina Verbica