Masa kundër gripit të shpendëve në Shqipëri
19 Janar 2006Importi i pulave dhe produkteve të shpendëve nga Greqia, Turqia dhe Rumania është i ndaluar rreptësisht të hyjë në territorin shqiptar. Ky është urdhëri i Ministrit shqiptar të bujqësisë e ushqimit, Jemin Gjana lëshuar pak ditë më parë për Drejtoritë rajonale të bujqësisë e ushqimit. Në të gjithë pikëkalimet kufitare jugore në Qafëthanë, Kapshticë, Tre urat, Përmet e Kakavije janë ngritur postat e karantinës për të kontrolluar situatën e mos lejuar importet e pulave e produkteve të shpendëve.
Drejtori rajonal i bujqësisë e ushqimit në Gjirokastër, Bekim Sinani pohon se postat e karantinës janë të pajisura me specialistë dhe asistencë teknike të specialistëve të Bashkimit Europian për të kontrolluar krejt situatën. Sipas drejtorit Sinani, në pikëkalimet kufitare jugore realizohet kontrolli i imët, ndërkohë që në funksion të këtij procesi janë vendosur edhe laboratorët e analizave të hollësishme bakteriologjike për të mbajtur nën vëzhgim të rreptë pularitë vendore.
Paralelisht me këto masa, janë kryer e po kryhen edhe teste e analiza përgjatë kufirit me shtete si Greqia e Maqedonia, prej nga ku mund të vijë edhe rreziku i përhapjes së virusit të gripit të shpendëve. Zbulimi këtij virusi në Turqi, vend, nga i cili vjen dhe një pjesë e rëndësishme e importeve e që kalon nëpër pikëkalimet kufitare jugore, duket se i ka vënë në alarm institutin e studimeve veterinare, ministrinë e bujqësisë dhe atë të shëndetësisë. Qeveria shqiptare pas lajmit mbi afrimin e virusit të gripit të shpendëve në Turqi, rivendosi masa të rrepta karantine në pikëkalimet kufitare të jugut të Shqipërisë për të ruajtur popullatën nga ky virus.
Pulat dhe prodhimet e shpendëve, që importoheshin nga Greqia, Turqia e Rumania, me urdhërin e ri të pak ditëve më parë të Ministrisë shqiptare të bujqësisë e ushqimit janë rreptësisht të ndaluara të hyjnë në territorin shqiptar. Postat karentinore kanë tani detyrën e përgjegjësinë të kontrollojnë pikëkalimet doganore kufitare si dhe gjithë gjatësinë e vijës kufitare me këto vende.