Maqedonia intensifikon përpjekjet diplomatike me Brukselin
22 Nëntor 2005Maqedonia duket se po bën të gjitha përpjekjet që të shkëputet nga treshja ballkanike e përbërë nga Shqipëria, Serbia dhe Bosnja dhe të vihet në një rradhë me Turqinë dhe Kroacinë në garën e anëtarësimit për në BE. Ky ishte edhe shkaku kryesor i vizitës në Bruksel të shefes së diplomacisë maqedonase, Ilinka Mitrevës dhe takimeve që ajo zhvilloi me komisionerin përgjegjës për zgjerimin, Olli Rehn si dhe diskutimeve që pati në Komisionin e Punëve të jashtme të Parlamentit Europian. Duket se në Shkup kanë krijuar bindjen se anëtarësimi i vendeve të Ballkanit Perëndimor, dhe sidomos i Shqipërisë, Federatës serbo malazeze si dhe asaj bosnjake do të shtyhet për në kalendat greke, prandaj zyrtarët e lartë maqedonas, tani që Komisioni Europian i hapi dritën jeshile njohjes së këtij vendi si kandidat për në BE, po ushtrojnë presionin maksimal, që më së shumti gjatë vitit të ardhshëm edhe Maqedonia të fillojë negociatat e anëtarësimit.
Ndofta për këtë shkak shefja e diplomacisë maqedonase përdori një gjuhë shumë mikluese ndaj deputetëve të Parlamentit Europian, kur u përpoq të jepte një tabllo rozë të gjendjes së përgjithshme në vendin e saj. Ajo e vuri theksin sidomos në vlerat europiane që rrezaton vendi i saj si dhe në situatën e shëndoshë që gjallon sot në Maqedoni, që pas vënies në jetë të Marrëveshjes së Ohrit.
Por duket se jo të gjithë europarlamentarët u bindën nga retorika e ministres maqedonase. Shumë prej tyre vunë në dukje se Maqedonia do të kishte rrëshqitur në një luftë civile, në rast se nuk do të kishte ndërhyrë bashkësia ndërkombëtare që i imponoi Shkupit hartimin dhe vënien në jetë të marrëveshjes së Ohrit.
Kështu europarlamentari hollandez, Meijer, i vuri në dukje Mitrevës se përsa kohë që forca nacionaliste dhe ekstremiste do të flasin në Shkup për një popull dhe për një gjuhë të vetme, për aq kohë negociatat e anëtarësimit do të bllokohen. E këtij mendimi ishte edhe eurodeputetja gjermane, Doris Pack, e cila pasi shprehu mbështetjen dhe aprovimin e saj për hapat e hedhur deri më sot në këtë republikë, nënvizoi se situata mund të quhet e konsoliduar vetëm kur shqiptarët të ndjehen të barabartë me maqedonët. Afërsisht ky ishte edhe toni i përdorur nga eurodeputeti austriak Swoboda, ai britanik Piter etj.
Acarim dhe pakënaqësi shkaktoi edhe kësaj rradhe diskutimi i europarlamentarit grek, Karaxhaferri, i cili duke kundërshtuar emërtimin e vendit si Maqedoni aludoi deri edhe për një aneksim të mundshëm të një pjese të Greqisë nga ana e Shkupit.
Situata në rajon dhe sidomos problemi i liberalizimit të vizave nga BE-ja ndaj qytetarëve të maqedonas ishin disa thekse të tjera në ekspozenë që ministrja e Shkupit paraqiti në Bruksel. Duke u ndalur në çështjen e Kosovës, shefja e diplomacisë maqedonase u shpreh se Shkupi mbështet plotësisht qëndrimin e BE-së ndaj zgjidhjes së këtij problemi dhe se qeveria maqedonase do të përkrahë çdo zgjidhje që nuk vë në rrezik stabilitetin e vendit të saj.