Gjigantët amerikanë i lënë pas koncernet e bursës DAX
28 Dhjetor 2021Kompanitë e mëdha amerikane në sektorin e teknologjisë vazhdojnë t'i lënë pas kompanitë e tjera. Në vitin 2021, tre kompanitë më të mëdha të teknologjisë Apple, Microsoft dhe Alphabet, kompania mëmë e Google-s, përjetuan rritjen e vlerës së tyre në tregun e aksioneve me 2.2 bilionë euro. Një vështrim në ekonominë gjermane tregon dallimet e mëdha: në të vërtetë, 40 grupet e indeksit më të madh gjerman të aksioneve, DAX, kanë një vlerë totale prej vetëm 1.86 bilionë eurosh - më pak se rritja e vlerës së koncerneve kryesore të teknologjisë këtë vit.
Edhe në shkallë evropiane, mbizotërimi është i njëjtë. Kështu, me vlerën e 6.4 bilionë euro, tre lojtarët e mëdhenj në teknologji vlejnë më shumë se 50 kompanitë më të mëdha në eurozonë. Kjo del nga një analizë e gazetës "Handelsblatt” për 100 koncernet më të mëdha në botë për sa i përket vlerës në bursë.
Me Amazon-ën, Tesla-n dhe koncernin e Facebook-ut Meta, pamja është edhe më drastike. Sipas të dhënave të Factset, rritja e kapitalizimit të tyre kolektiv në treg në vitin 2021 arriti në rreth 2.56 bilionë euro. Kapitalizimi i tregut - i quajtur edhe vlera e tregut - është vlera e përgjithshme e të gjitha aksioneve në një kompani.
Apple dhe Microsoft kanë arritur 3 bilionë dollarë
Këtë vit, Apple dhe Microsoft kanë arritur shifrën prej 3 bilionë dollarësh, ndërsa Tesla dhe Meta kanë arritur për herë të parë 1 bilion dollarë. "Kompanitë e teknologjisë që hyjnë në klubin një bilion dollarësh shihen tani në Silicon Valley pothuajse si një filxhan kafeje”, tha për CNBC Dan Ives, një analist teknologjik nga Wedbush Securities. "Nuk është më mega-ngjarja siç ishte dy ose tre vjet më parë." Sipas tij, zhvillimet tregojnë se kompanitë e mëdha amerikane të teknologjisë janë në pozitë të pakrahasueshme pas pandemisë.
Në fakt, me përjashtim të Saudi Aramco-s, grupi më i madh energjetik në botë, pesë nga gjashtë koncernet më të vlefshme në botë janë kompani amerikane të teknologjisë. Të gjitha ato vlejnë më shumë se një bilionë dollarë amerikanë, sipas CBNC. Sipas ekspertëve, gjigantët amerikanë ende mund ta lënë edhe më tej pas pjesën tjetër të botës. "Pavarësisht vlerësimeve më të larta, ne jemi gjykojmë në mënyrë më pozitive për SHBA sesa për Evropën," tha për "Handelsblatt" strategu i investimeve Peter Spijkman nga Aegon Asset Management. "Kompanitë e teknologjisë pritet të rriten më shpejt në afat të gjatë sesa industritë më tradicionale”.
Dy sipërmarrje gjermane arritën në top 100
Për krahasim, sipas përllogaritjeve të gazetës, vetëm dy sipërmarrje gjermane arritën të hyjnë në top 100. SAP, kompania më e vlefshme gjermane, është në vendin e 78-të, Siemens mezi ka arritur të hyjë në listë. Konglomerati gjerman është në vendin e 93-të. Kësaj i shtohet kompania gjermano-amerikane Linde plc në vendin e 77-të.
"Handelsblatt" rendit disa arsye për dominimin amerikan: Nga njëra anë, Tesla dhe Amazon mund të provojnë se mund t'ia vlejë që një investitor t'u besojë që herët kompanive amerikane në rritje, të cilat nuk nxjerrin fitime prej vitesh, por mbi të gjitha janë sinonim i ideve dhe i ekspansionit. Në Gjermani, kjo nuk funksionon vërtet, siç tregon për shembull Delivery Hero.
Përveç kësaj, ekonomia e Gjermanisë karakterizohet nga sipërmarrjet e nivelit të mesëm dhe nga industria. Kjo strukturë nuk vlerësohet domosdoshmërisht në bursë. Së fundi, disa grupe të mëdha si Aldi apo Bosch nuk janë të listuara në bursë dhe për këtë arsye nuk shfaqen në statistika.
aud (hb, tgsch)