CeBIT 2012 dhe siguria

Asnjë CeBit nuk ka qenë pa ndonjë temë të madhe. Disa vjet më parë, temë kryesore ka qenë Green IT, që mendohej të sillte revolucion në botën e teknologjisë së informacionit. Më vonë u fut Cloud (= re) sipërmarrjet dhe konsumentët duhet të vendosnin të dhënat e tyre në internet, dhe t'i përdornin ato nga interneti, pra nga Cloud.   

Por kjo has rezistencë, sepse duhet ndryshuar mënyra e të gjykuarit që t'i bësh firmat t'ia besojnë të dhënat dhe proceset e biznesit një reje anonime. Kështu që sektori i teknologjisë së informacionit ka gjetur tani një temë të re për të arritur rritjen e besimit: "Managing Trust" është tema kryesore e CeBIT-it të sivjetshëm, i cili do të hapë portat të martën e ardhshme (06.03.2012) në Hanover.

"Pa arritur besimin e klientëve, modelet tona të biznesit sidomos ato që kanë të bëjnë me teknologjinë e rrjeteve nuk do të jenë të qëndrueshme," thotë Dieter Kempf, president i Shoqatës së këtij sektori, asaj Bitkom. Dhe në fakt pas shumë avarive të shkaktuara në mbrojtjen e të dhënave, sektorit i duhet shumë punë për të vënë besimin në vend. "Managing Trust" do të jetë linja që do të shoqërojë të gjithë ofertat në CeBIT.

Lojë shifrash

Menaxherët e panairit presin që në panair të marrin pjesë 4200 firma prezantuese nga 70 vende. Ky volum është më i madh se një vit më parë. Firmat që nuk kanë marrë pjesë në panairet e fundit janë kthyer sërish, si përshembull gjigandi i elektronikës koreane Samsung, ose koncerni japonez i elektronikës, Sharp.

Por numrat e firmave që prezantohen, vizitorët dhe sipërfaqet e panairit nuk thonë shumë. "Nëse panairi do të jetë i sukseshëm apo jo nuk e vendosin këto shifra, por e vendosin kontaktet e biznesit," thotë shefi i panairit, Ernst Raue.

Megjithatë CeBIT-i nuk është më panair biznesi. Në vitin 2011 panairi prezantoi një koncept të ri, i cili mbështetet në katër shtylla. "Pro" është fusha e sipërmarrjeve, "Gov" është për Government, pra zgjidhje IT-je për sektorin publik, "Lab" është për fushën kërkimore dhe "Life" duhet t`i përgjigjet gjithë përdoruesve privatë, pasi vitet e kaluara u është kushtuar më shumë vëmendje ndaj vizitorëve të specializuar.

Kongresi

Por edhe vizitorët e specializuar vijnë në Hanover me kostot e tyre. Zgjidhjet në sektorin e teknologjisë së informacionit bëhen gjithnjë e më shumë komplekse dhe me nevojë për shpjegime. Prandaj në CeBIT vijnë qindra prezantues të specializuar, ku ekspertët mund të marrin mendime. Në fakt CeBIT është zhvilluar si Kongresi më i madh i teknologjisë së informacionit, me folës të profileve të larta, si përshembull Kevin Turner, nga CEO i Microsoft-it, ose Eric Schmidt, kryetar i Këshillit Administrativ të Google.

E gjithë kjo josh edhe prominencën politike. Rreth130 delegacione nga politika dhe ekonomia shkojnë në Hanover, mes të tjeras Neelie Kroes, zëvendëspresidente e Komisionit Evropian dhe Komisare për "Axhendën digjitale", dhe Viviane Reding, Komisare për Drejtësinë dhe ish- Komisare e TI.

Veç kancelares gjermane Angela Merkel, CeBIT-i do të hapet edhe nga presidentja e Brazilit, Dilma Rousseff. Brazili është këtë vit vend partner i CeBIT-it.  

Autor: Rolf Wenkel/ Aida Cama

Redakoi:  Auron Dodi