Магілеўскія студэнты-“каліноўцы” не збіраюцца вяртацца на радзіму?
7 января 2009 г.
Упершыню за ўвесь час існавання праграмы дапамогі рэпрэсаваным "Салідарнасць" магілеўцы зразумелі, што большасць студэнтаў-"каліноўцаў" на радзіму не вернецца. Амаль усе яны правялі святочныя выходныя ў Еўропе. Выключэннем стаў Аляксей Века, які прыехаў на свае першыя еўрапейскія вакацыі. У Чэхіі ён вывучаецца ўсяго паўгады. Новыя магчымасці, кажа юнак, цалкам змяняюць жыцце і светапогляд моладзі, і сваіх калегаў, якія не звяртаюцца на радзіму, ён цалкам разумее. Паводле Векі, беларускія рэаліі зараз не патрабуюць людзей з еўрапейскім узроўнем адукацыі, еўрапейскім дыпломам і складам розуму, людзей, якія могуць аналітычна разважаць.
Хто з’ехаў - не шкадуе
Аляксей Века, па словах яго настаўнікаў, з’яўляецца тым інтэлектуальным патэнцыялам, які губляе Беларусь з-за палітычных чыннікаў.
У мінулым годзе грамадскі актывіст атрымаў дыплом трэцяй ступені на міжнароднай алімпіядзе па геаграфіі ў Тунісе. Гэта давала яму права паступіць у БДУ без іспытаў, але калі з’явілася магчымасць працягваць адукацыю ў Еўропе, юнак адразу ж пагадзіўся, аб чым не шкадуе. Века ўпэўнены, што ў Беларусі, у тым жа Мінску, не атрымаў бы такі ўзровень адукацыі. Ён таксама адзначае, что ў Еўропе вучаць мысліць аналітычна, там не мае значэння, колькі ты ведаеш розных датаў, галоўнае - як ты можаш свае веды скарыстаць.
Аляксей кажа, што нават і не разлічваў на тыя магчымасці, якія з’явіліся ў яго пасля атрымання дазволу на пражыванне ў Чэхіі. Напрыклад, адкрытасць Еўропы падштурхнула яго проста дзеля інтарэсу паехаць да хаты праз Амстэрдам.
Вытрымліваюць не ўсе
Аднак далёка не ўсе камфортна адчуваюць сябе ў новых умовах. Іван вярнуўся з Польшчы пасля году навучання па праграме імя Кастуся Каліноўскага. Цяпер ён - студэнт адной з магілеўскіх ВНУ.
Іван пагаджаецца, што датычна якасці навучання Еўропа - гэта вельмі добра, але пачуцце адзіноты не дазволіла яму там застацца. Ён вучыўся ў Торуні, але не вытрымаў - беларусаў параскідалі па розных гарадах, чулася адарванасць ад звыклай атмасферы, ад сяброў. Апынуўшыся з галавой у польскім менталітэце, юнак проста не змог яго ўспрыняць.
Па заканчэнні вучобы – Еўропа як магчымасць
Але тыя, хто вытрымаў, глядзяць у жыцце з аптымізмам. Яшчэ паўгады таму Аляксей сцвярджаў, што абавязкова вернецца на радзіму, аднак аднаго семетра хапіла, каб юнак цалкам змяніў свае планы.
Па заканчэнні вучобы ў Чэхіі ён збіраецца працягваць навучанне, магчыма паспрабуе паступіць ў магістратуру ў якой-небудзь іншай еўрапейскай краіне. А пазней хацеў бы атрымаць еўрапейскі натуральны досьвед працы.
У 2008 годзе колькасць магілеўцаў, якія вучацца ў Чэхіі вырасла ўдвая. На чарзе ад’езд яшчэ двух былых студэнтаў. Мяркуецца, што яны адправяцца ў Прагу на пачатку другога семестру. Як жартуюць хлопцы, у Чэхіі хутка з’явіцца невялічкая магілеўская дыяспара. Але, як вядома, у кожным жарце есць частка праўды.
Аляксандар Буракоў