یو چینایي شرکت غواړي د برق په تولید کې پانګونه وکړي
۱۴۰۰ خرداد ۹, یکشنبه
اعلان
یو چینایي شرکت د بریښنا د تولید له پاره په افغانستان کې ۴۰۰ میلیونه ډالره پانګونه کوي. د افغانستان د جمهوري ریاست په اعلامیه کې راغلي دي چې ولسمشر محمد اشرف غني «د چینایي پانګوالو له یوې ډلې سره چې له ډبرو سکرو څخه د بریښنایې انرژۍ تولید ته لیواله دي، لیدلي دي.»
ولسمشر د پانګونې په برخه کې د سهولت رامنځته کوونکو واحدونو ته امر کړی دی چې په دې برخه کې اړينې ارزونې ترسره او همکاري وکړي. ټاکل شوې ده چې دغه شرکت به له ډبرو سکرو څخه په استفادې ۳۰۰ میګاواټه برق تولید کړي.
افغانستان د نوې کیدو وړې انرژۍ لکه لمریزې او بادي انرژۍ د تولید پراخې طبیعي سرچينې لري. اوس د نړۍ په ډیر شمیر هیوادونو کې د کاربن ډای اکسایډ د تولید او چاپيریال د ککړتیا د مخنوي په خاطر هڅه کیږي د فوسیلي انرژۍ د تولید مخه ونیول شي.