کیف په ماریوپول کې د سولې شواهدو ته انتظار باسي
۱۴۰۱ فروردین ۱۱, پنجشنبه
په ماریوپول کې د سره صلیب ګودام اغیزمن شوی
په ماریوپول ښار کې د سره صلیب نړیوالې کمېټې ګودام د روسیې د بمبارۍ په پایله کې اغیزمن شوی دی. دغه خبر اسوشېتید پرس خبري آژانس د سټلایټ انځورونو د ارزولو په پایله کې ورکړی دی. د سي ان ان، تلویزوني شبکې هم دغه خبر نشر کړی دی.
په یوه بیانیه کې د سره صلیب نړیوالې کمیټې ویلي دي چې دوی د مارچ ماشتې په اوایلو کې په دغه ګودام کې ټول مواد وېشلي وو او د مارچ له ۱۵مې نېټې راهیسې هلته کوم پرسونل نه وو.
ترکیه کې د شوو مذاکراتو پایله څه وه؟
د ترکیې د بهرنیو چارو وزیر مولود چاوش اوغلو، ویلي دي چې په استانبول کې د اوکراین او روسیې ترمنځ د شوو مذاکراتو نتیجه د عمل په ډګر کې نه ده پلي شوي. ترکیې هوډ څرګند کړی دی چې د اوکراین او روسیې د بهرنیو وزیرانو ترمنځ به بیا ملاقات ته لاره هواره کړي. چاوش اوغلو په خپلو څرګندونو کې دا هم ویلي دي چې د استانبول په مذاکراتو کې د پام وړ پرمختګ شوی.
د چاوش اوغلو په خبره روسي اولیګارش رومان ابرامووچ، د کیف او مسکو تر منځ د همکارۍ په برخه کې رغنده رول لوبولی او د جګړې له پیل راهیسې د هغې د ختمولو له پاره په «ریښتني» ډول کار کوي.
زیلنسکي د آسترالیا پارلمان ته وینا کړې
په عین وخت کې د اوکراین ولسمشر ولودیمیر زیلنسکي د آسترالیا پارلمان ته وینا کړې او پر روسیې یې د بندیزونو د سختولو له پاره غږ کړی دی. هغه په ویلي دي که آسترالیا ورسره بوش ماستر، په نوم د زغروال موټر مرسته وکړي نو دی به منندوی وي.
د هغه تر څرګندونو دمخه د آسترالیا لومړي وزیر سکاټ موریسن، زیلنسکي د «دیموکراسۍ د زمري» په توګه وستایه او د لومړي ځل له پاره یې ولادیمیر پوتین «د جنګي مجرم» په توګه یاد کړ.
له ماریوپول څخه د ملکیانو رایستل
د اوکراین مرستیالې لومړۍ وزیرې ایرینا ویریشوک، ویلي دي چې د کلابند شوي ښار ماریوپول پر لور د سرویسونو کاروان استول شوی، ترڅو له هغه ځایه د ملکیان د رایستلو هڅه وشي. د سره صلیب نړیوالې کمیټې ویلي دي چې روسیې د یوه بشري دهلیز په رامنځ ته کیدو توافق کړی، چیرې چې د روسیې د څو اونیو بمباریو وروسته هلته په لسونو زره کسان بند پاتې دي.
په راتلونکو ورځو کې د سختو جګړو اټکل
د بریتانيا پوځي استخباراتو ویلي دي چې په راتلونکو ورځو کې ښایي د کیف په اطرافو کې سختې جګړه وشي. زیاته شوې ده چې د روسیې له لوري د کم شمیر قطعاتو پر ایستلو سربیره روسي ځواکونه د کیف ختیځ او لویدیځ لور کې خپل حضور ته ادامه ورکړې.
د بریتانيا د پوځي استخباراتو په وینا په ماریوپول کې پر درنې جګړې سربیره، اوکرایني ځواکونو د ښار د سویل ختیځې برخې کنترول په لاس کې لري.
د بیا رغاونې او پراختیايي چارو اروپایي بانک ویلي دي سږ کال به د روسیې اقتصاد لس سلنه راټیټ شي او همداشان د روسیې د یرغل له کبله به د اوکراین داخلي ناخالص تولیدات ۲۰ سلنه راښکته شي.