څېړنه: د دوبي ګرمي د کرونا د شیوع مخنیوی نه کوي
۱۳۹۹ اردیبهشت ۳۱, چهارشنبه
د پرنستون د پوهنتون څيړونکي د خپلو تحقیقاتو په ترڅ کي چې نتیجه یې د «ساینس» په نامه علمي مجله کي خپره سوې، دې نتیجې ته رسیدلي چي د دوبي ګرمي، یوازي په محدوده اندازه ددې توان لري چي ښایی د کرونا د پاندیمي مخه ونیسي. د څيړونکو په خبره، د کرونا پر نوي ویروس باندي د اوبو او هوا د شرایطو اغیزه ډیره کمه ده.
په هغه مقاله کي چي د ساینس په مجله کي خپره سوې راغلي چي، د رطوبت د درجې لوړوالی، د معمولي ویروسونو او انفلونزا د ویروس د پراخیدو مخه نیولای سي خو دا د کرونا د نوي کووید ۱۹ ویروس په وړاندي چنداني اغیزه نه لري. دا ځکه چي د اکثرو انسانانو بدن ددغه ویروس په مقابل کي لازم دفاعي حالت ته لاس رسی نه دی پیدا کړی.
پلټونکي په دې باور دي چي د کرونا نوی ویروس به د هوا او اوبو د عواملو سره سره همداسي د پراخیدو په حال کي وي.
هغوی په همدې ارتباط په ګرمسیرو هیوادونو لکه برازیل، اکوادور او آسترالیا کي د کرونا د پاندیمي بهیر ته اشاره کوي او هغه د خپلي ادعا شاهد بولي.
د پرنستون د پوهنتون څيړونکي په دې باور دي چي د اوبو او هوا عوامل هغه وخت اغیزمن وي چي ډیری انسانانو د کرونا د جدي ویروس په وړاندي لازم ایمني حالت ته لاس رسی پیدا کړی وي او دغه ویروس په یوې فصلي ناروغۍ بدل سي. د ساینس په مجله کي د خپری سوي مقالې یو لیکونکی، براین ګرنفل، وایی: « موږ دا خبره د کرونا په مخکینیو ویروسونو کي چي د ریزش او زوکام سبب کیږي، پلټلې . په ځانګړي ډول د ژمي په موسم او هغو سیمو کي چي ګرمسیري نه دي.»
زموږ له آرشيف څخه: