په پاکستان کې د نجونو يو ښوونځی سوځول شوی
۱۴۰۳ خرداد ۹, چهارشنبه
د آلمان خبري آژانس په حواله،پاکستاني چارواکو د چهارشنبې په ورځ وويل چې دغه ښوونځي په شمالي وزیرستان کې د افغانستان پولې ته نژدې په یوه لیرې پرته سيمه کې سوځول شوی دی.
خبري آژانس زیاتوي چې ښوونځي ته د دوشنبې په شپه اور اچول شوی، خو د ځايي پولیسو مشر رحمان خان، وويل چې دوی ته ېې خبر د چهارشنبه په ورځ (د ۲۰۲۴م کال د می ۲۹مه) ورکړل شوی دی.
په سيمه کې افراطي ډلو له کلونو راهیسې د نجونو له تعلیم سره مخالفت ښودلی دی او په وروستیو کې ېې د نجونو ښوونځيو سوځولو، د ښځينه زده کونکو د امنیت په هکله تازه انديښنې راپارولي دي.
مخکې له دې چې د پاکستان پوځ په ۲۰۱۴م کال په شمالي وزیرستان کې د افراطي وسلوالو پر ضد چاڼيز عملیات پيل کړي، دغه سیمه د کلونو له پاره د القاعده شبکې او ورسره د تړاو لرونکو طالبانو یو مرکز وو.
د آلمان خبري آژانس په خپل رپوټ کې زیاتوي د ۲۰۰۷ او ۲۰۰۹ کلونو په منځ کې کله چې پاکستاني طالبانو د پاکستان پر وزیرستان او سوات علاقو کنټرول درلود، د نجونو په سلونو ښوونځي ېې په بمونو الوځولي ول.
په ۲۰۱۴م کال کې د پاکستان پر يو ښوونځي وسله واله حمله کې شاوخوا ۱۵۰ ماشومان ووژل شول. په وروستیو اوونيو کې د ښوونځيو سوځولو پېښې، یو ځل بیا په خلکو کې د نجونو د تعلیم او د هغوی د امنیت په هکله اندېښنې راپارولي دي.