په هرات کي د واکسين کمښت او د کرونا پيښو زياتېدل

خو د هرات د عامې روغتیا سرپرست وايي چې د واکیسن لړۍ له سره پیل شوې خو د هغه په خبره، نړیوال باید د افغانستان روغتیايې خدمات سیاسي نه کړي، خپلو مرستو ته په دې برخه کي لازمه پاملرنه وکړي. د هغه په خبره که مرستي دوام و نه کړي نو دوی به نه یوازي د کرونا، بلکي په نورو څانګو کي هم د روغتیايي تجهیزاتو له کمښت سره مخامخ شي چې په دې صورت کي به بیا د ناروغانو او مړو شمیر ډیریږي.

د هرات د عامې روغتیا سرپرست ډاکترمحمد آصف کبیر وايي، د هوا په سړیدو سره په دې ولایت کي د کرونا له امله د ناروغانو شمیر زیات شوی چې د ډاکتر کبیر په خبره، هره اونۍ د شپږ تر اوه سوه داسې کسان د ټست له پاره روغتون ته ورځي چې کرونا ته ورته علایم لري نو هغه کسان چې په کرونا اخته وي هغوی په روغتون کي بستر کیږې.

ډاکتر آصف کبیر وايي، کرونا هغه ویروس دی چې په نړۍ کي یې ستونزي رامنځ ته کړي نو ځکه خو لازمه ده چي د یوې خوا خلک کرونا جدي وګڼي او له بلې خوا نړیواله ټولنه نه باید په افغانستان کي روغتیايي برخه سیاسي کړي، ځکه موږ »د یوې خوا ضرورت لرو چي لا ډیر واکسین او روغتیاېې توکي ترلاسه کړو او له بلې خوا زموږ د روغتیايي کارکوونکو د څو میاشتو معاشونه نه دې ورکړل شوي.« هغه هیله څرګنده کړې چې په دې برخه کې پاملرنه وشې، څو روغتیايي خدمات ټکني نه سي ځکه روان بهیر زموږ په زیان دی:

»له هغه وخت راهيسي چې په افغانستان کي سیاسي تحول رامنځته شوو موږ ډیرې هغه مرستي چي نړیوالو زموږ صحي برخي سره کولې له لاسه ورکړي، ورسره مالي مرستي دریدلې نه یوازې د کرونا بلکي په نورو صحي برخو کي هم داسې شوې، زموږ روغتیايي خدمات چې په نړیوالو مرستو پوري تړلې که ټکني وي ډیر ناروغان مو ژوند له لاسه ورکوي.«

که څه هم د هرات د عامې روغتیا ریاستا سرپرست ستونزي مني خو وايي چې د کرونا یوه اندازه واکسین برابر شوي خو د هرات ولایت اوسیدونکي بیا وايي چې روغتیايي خدمات د پخوا په پرتله تر ډیره ټکني شوې او د کرونا واکسین هم خلاص شوي دي.

محمد نسیم چې د هرات اوسیدونکی دی وايي: »زه نن د هرات حوزوي روغتون ته ولاړم تر څو د کرونا پر وړاندي ځان واکسین کړم خو هلته راته وویل شو چې د کرونا واکسین خلاص سوی، موږ د اسلامي امارت له مسؤلینو غوښتنه کوو چې هیواد ته واکسین را وارد کړي، څو د یاد ویروس د خپریدو مخنیوی وشي.«

بل لور د انتاني برخي متخصص ډاکتر غلام  داود هاشیمي، وايي چې که خلک صحي تدابیر ونه نیسې د کرونا د پیښو شمیرې به ډیرې شې او ممکن د کرونا اومیکرون نوې څپه هم د خلکو ترمنځ خپره شي چې هلته به بیا ډیر لوی سرخوږی جوړ کړي: »په ورستیو کي په روغتونونو کي د تبې او تنفسي نارغیو علایم ډیر لیدل کیږې چې تر معایناتو وروسته ډیرو کې یې د کرونا تشخیص کیږې، زه هغه ناروغانو ته چې تنفسي علایم لري وایم پر ځان دي ډیر پام وکړي که هغوی په کرونا اخته سي نو متاسفانه ځانونه به له لاسه ورکړي.«

د یادونې وړ ده چې هرات د افغانستان په لویدیځ کي پروت هغه ولایت دی چې د کرونا لومړنۍ څپه پکې ولیدل شوه او په افغانستان کې تر ټولو زیاته د کرونا مړینه او مثبتي پيښي په همدې ولایت کي ثبت سوي چې تر دمګړۍ ۱۶۸۰۰ تنه په کرونا اخته او ۷۲۰ تنو خپل ژوند له لاسه ورکړی.

زموږ له آرشیف څخه: