بامیان کي د ۷ ولایتونو د نجونو د بایسکل ځغلونی سیالي پیل سوې

د افغانستان د بایسکل ځغلوني د ملي فدراسیون مسوولین ددغي سیالۍ د پر لاره اچولو هدف د استعدادونو پیژندل، د ښځو د ملي ټیم ټاکل، د ورزشکارو ښځو تشویق او د بامیان د طبیعي سیمو معرفي کول په ګوته کوي او وايي چي دغه سیالي د دوو ورځو له پاره ده.

په افغانستان کي د ښځو د بایسکل ځغلوني فدراسیون عمومي رئیس فضل احمد فضلي وايي چي په دغه سیالي کي د کابل، هرات، بلخ، فاریاب، غزني، دایکندي او بامیان ولایتونو نجونو ګډون کړی دی. هغه زیاتوي چي په دغو نجونو کي عالي استعدادونه موجود دي او هیله مند دی چي ددغو ورزشکارانو په انتخاب سره په راتلونکي کي وکولای سوي له بهرنیو هیوادونو سره سیالي وکړای سي او د خپل هیواد له پاره لاس ته راوړني ولري.

بامیان د کال په ټولو فصلونو کي د کوهنوردۍ، او ژمنیو ورزشونو له پاره تر ټولو مناسب ځای دی او په خاص ډول د پسرلي، دوبي او مني په فصل کي د بایسکل ځغلوني له پاره تر ټولو ښه ځای بلل کیږي.

دغه سیالي د چهارشنبې په ورځ د ۳۰ کیلومتره په واټن ددغه ولایت له شیبر ولسوالۍ څخه پیل او د بامیان په مرکز هوايي ډګر تر سړکه یې ادامه پیدا کړه او ورزشکارانو یو له بل سره سیالي وکړه.

ددغي سیالۍ یوه ګډونواله نوریه وايي چي له درو کلونو راهیسي یې بایسکل ځغلونه شروع کړې او هیله منده ده چي د بایسکل ځغلوني په ملي ټیم کي شامله سي.

ویل کیږي چي بامیان د امنیت، یو له بله سره زغم، د نجونو ډیر حضور، آزادي، مناسبي هوا، لوړو غرونو، پاخه سړکونو او ښایسته طبیعي منظرو په لرلو سره د بایسکل ځغلوني له پاره تر ټولو غوره ځای دی.

زهرا محمدي چي د بلخ ولایت څخه یې په دغو سیالیو کي ګډون کړی وايي چي بامیان د فرهنګي او ورزشي فعالیتونو له پاره تر ټولو ښه ځای دی، دا ځکه چي دلته خلک د نجونو د فعالیتونو او پرمختګ مخه نه نیسي. هغه زیاتوي چي نجوني دلته د بلخ او د افغانستان د نورو ولایتونو په پرتله آزادانه ګرځي او ورزش کوي او له کوم ټولنیز خنډ سره نه مخامخ کیږي.

خو ورزشکاراني بیا د امکاناتو له کمښت، معیاري بایسکلونو نه درلودلو، د دولت او د ورزش څخه د ملاتړو بڼسټونو له نه پاملرني څخه شکایت کوي او وايي: د ځینو پروژو د عملي کولو له پاره له نجونو څخه ناوړه استفاده کیږي. له بلي خوا بیا د بامیان محلي مسوولین په دغه ولایت کي د ورزشي سیالیو او جشنونو له لمانځلو څخه هرکلی کوي او وايي چي دا کار ځوانانو ته مناسب امکانات برابروي.

دا په بامیان کي د کرونا ویروس له پراخیدو راهیسي لومړنۍ ورزشي سیالي ده چي د هیواد له مختلفو سیمو څخه راغلو ورزشکارانو پکښې ګډون کړی دی.

په تیرو لسو کلونو کي په دغه ولایت کي د سپورت بیلابیلي سیالۍ ترسره سوي چي پکښي د ښځو حضور په ښکاره ډول لیدل کیږي.

د باميان ولايت پورې اړوند زموږ له آرشيف څخه يو انځوريز البوم: