په پاریس کې د پي ټي ام لاريون؛ غوښتنې څه دي؟
۱۴۰۱ آبان ۲۹, یکشنبه
په پاریس کې د يکشنبې ورځې د لاريون یو تنظيمونکي، حبيب الرحمن زمانخيل دويچه ويله ته وويل چې د لاريون لومړنۍ موضوع «په ټوله افغان خاوره کې د نجونو ښوونځيو د بېرته پرانستلو» موضوع ده.
زمانخيل چې ځان په فرانسه کې د پي ټي ام مشر معرفي کوي، زیاته کړه چې د نني لاريون نورې موضوع ګاني «په لر او بر کې د افغان وژنې درول، د پي ټي ام د ټولو بنديانو آزادول، د افغانستان د پخواني نظام ملکي او غیر ملکي منسوبانو د هدفي وژلو درول او په پاکستان کې د افغان ښځينه او نارينه مهاجرو د شکنجې او تحقیر» درولو موضوع ګانې دي چې په هکله به يې دوی نړیوالو ته خپل غږ اوچتوي.
نوموړي وويل چې دغه لاریون د پاریس ښار په رېپوبليک يا جمهوريت میدان کې په ځايي وخت د ماسپښين په ۲ بجو پيلیږي او د هوا د نه خرابوالي په صورت کې به تر ۵ بجو پورې ادامه ولري.
زمانخيل زیاته کړه چې تمه ده په لاریون کې د نورو اروپايي هیوادونو څخه هم ګډونوال حضور ولري: «له آمو تر اباسینه ټول افغانان که هغه هر قوم پورې تړلي وي، کولی شي موږ سره ګډون وکړي.»
د هغه په خبره، د پي ټي ام مشر، منظور احمد پښتين به هم ګډونوالو ته خپل پيغام واوروي. پښتين پر خپلې فیسبوک پاڼه يوه خپره کړې ويډېو کې له خلکو غوښتي چې په دغه لاریون کې ګډون وکړي: «په دغه لاریون کې به په پښتونخوا کې د ناامنيو پر ضد، په افغانستان کې د ښځو د تعلیم په حق کې او د علي وزیر او حنیف پښتين د خلاصولو او نورو ستونزو په هکله غږ پورته کيږي.»
د حبيب الرحمن زمانخيل په خبره، دوی په راتلونکې کې دا ډول نور لاریونونه هم په نظر کې لري او هیله مندي ېې وښوده چې مثبت اثرات به ولري.
د منظور احمد پښتين په مشرۍ د پښتون ژغورنې غورځنګ له څو کلونو راهیسې د پښتنو د حقونو او په ځانګړې توګه د خیبر پښتونخوا په قبايلو سیمو کې د ناامنیو، د پښتنو د وژلو، لادرکه کېدو او نيولو خلاف اعتراضي غونډې کوي.
دوی د پاکستان پر حکومت تور لګوي چې په پښتون ميشته علاقو کې خلک په یو او بل نوم ځوروي، هغوی نيسي او وژني يې. تر اوسه د دغه غورځنګ ځينې مخکښ غړي لکه ارمان لوڼي او عارف وزير وژل شوي دي. علي وزير چې د دغه غورځنګ بل مخکښ غړی دی د څه باندې دوو کلونو راهیسې په بند کې دی. خو په وروستيو کې د پښتون ژغورنې غورځنګ مشر منظور پښتین ویلي، چې په میرانشاه کې د علي وزیر ضمانت منظور شوی. د هغه په خبره «دا د علي وزیر پر ضد وروستۍ اف ای آر و». اف آی آر رسمي ليکلي شکايت يا عريضې ته ويل کيږي چې د ياد غورځنګ د غړو پر ضد وار په وار وړاندې کيږي.
م.ک.ص./م.ن.ص.