هسپانيا: شتمن اوکرايني کډوال په هدفمن ډول په نښه کيږي
۱۴۰۱ اسفند ۱۳, شنبه
دغه لس شکمن غله چې اووه تنه يې ورڅخه اوکراينيان او درې تنه نور يې روسي اتباع دي، د پوليسو په خبره داسې کډوال په نښه کوي چې »ډېری وخت خپلې ټولې سپما شوې پيسې او قيمتي شيان له ځان سره ساتي.«
دغه خبره د هسپانيې پوليسو د جمعې په ورځ وکړه. پر نيول شوو کسانو باندې تور دی چې په اوو آپارتمانونو کې يې د هسپانيې د اليکانته او مورسيا په ولايتونو کې اوکرايني کډوال په نښه کړي او په کورونو يې ورننوتلي دي.
پوليسو د خپلو څرګندونو په حواله د ۱،۲۵ ميليونو يورو په ارزښت قيمتي شيان ضبط کړي دي چې د پوستي ټيکټونو يو کلکسيون ورڅخه کابو نيم ميليونه يورو ارزښت لري. د دې تر څنګ د پولیسو په خبره ګاڼه او کمپيوټرونه هم ضبط شوي دي.
دا هم ويل شوي دي چې شکمنو غلو د خپلو قربانيانو په موټرو کې د هغوی د ځای ځایګي معلومولو په پار ديجيتالي وسيلې لګولې وې څو هغوی تعقيب کړای شي.
د جنورۍ په مياشت کې هم هسپانوي پوليسو د يوې جرمي شبکې د ماتولو اعلان کړی و چې د تنباکو جوړولو درې فابريکې يې چلولې. په دغو فابريکو کې له اوکراين څخه هسپانيې ته تښتېدلي کډوال ځای پر ځای کړل شوي ول. هسپانيې يو کال مخکې د روسيې له خوا پر اوکراين د يرغل راهيسې څه نا څه ۱۶۰ زره اوکرايني کډوال په خپل هېواد کې منلي دي.
ن.ص / خ.ح