متحده ايالات غواړي د طالبانو سره رسمي خبري وکړي

له افغانستان څخه د امريکايي عسکرو د بشپړې انخلا وروسته د طالبانو او امريکا د متحده ايالاتو تر منځ هيڅ ډول رسمي خبري اتري نه دي سوي. اوس په پام کي نيول سوې چي د دواړو اړخونو تر منځ رسمي خبري اتري رامنځته سي. د امريکا د متحده ايالاتو د باندنيو چارو د وزارت وياند ويلي دي چي د شنبې او يکشنبې په ورځو به د قطر په پلازمېنه دوحه کي د امريکايي او طالب پلاؤ تر منځ ملاقات وسي.

د متحده ايالاتو د خارجه وزارت د وياند په وينا امريکايي پلاوی به په دغه ملاقات کي د طالبانو پر لوړ رتبه استازو ږغ وکړي چي طالبان بايد د نورو تر څنګ بايد بشري حقونه مراعت کړي. هغه زياته کړه: «موږ غواړو طالبان دې ته راوبولو چي د مېرمنو او انجونو په شمول د ټولو افغانانو حقونه مراعت کړي او يو ټول شموله داسي حکومت جوړ کړي چي پراخ ملاتړ ولري.»

مرستندويه سازمانونو ته د آزاد لاسرسي اجازه

د ياد امريکايي چارواکي په وينا دا چي افغانستان په ممکنه توګه د جدي او ژور اقتصادي رالوېدنې او د »ممکنه بشري بحران« سره مخامخ دی، نو پر طالبانو به ږغ وسي چي و اړمنو سيمو ته د مرستندويه سازمانونو آزاد لاسرسي ته اجازه ورکړي. د متحده ايالاتو د باندنيو چارو د وزارت د وياند په وينا امريکايي پلاوی به له طالبانو دا غوښتنه هم وکړي چي په افغانستان کي بند پاتو امريکايي اتباعو او د امریکا سره په افغانستان کي همکاري کوونکو افغان کارکوونکو ته له افغانستان څخه د وتلو اجازه ورکړي.

طالبانو د اګست مياشتي په منځ کي د هغه وروسته په افغانستان کي واک په خپل لاس کي راوست، کله چي له دغه هيواد څخه بهرنيو ځواکونو انخلا وکړه. طالبان د هغه راهيسي په نړيواله توګه د په رسميت پېژندل کېدو له پاره هڅې کوي.

د طالبانو حکومت په رسميت نه دی پېژندل سوی

د امریکا د متحده ايالاتو د باندنيو چارو وزارت په ښکاره توګه ويلي چي په دوحه کي د امريکايي پلاوي او طالبانو تر منځ د ملاقات په ترڅ کي به د طالبانو د په رسميت پېژندل کېدو ټکی نه وي شامل. د دغه وزارت په وينا د دغه ملاقات اصلي مقصد د امريکا د متحده ايالاتو د ملي منافعو په چوکاټ کي د عملي يا پراګماټيکو خبرو اترو ته دوام ورکول دي.

د واشنګټن او طالبانو تر منځ غير رسمي تماسونه ترمخه هم نيول سوي ول. دغه تماسونه د امريکا د متحده ايالاتو د پوځ له خوا له کابل څخه د بهرنيانو او افغانانو د انتقال د پروسې په جريان کي رامنځته سوي ول.

آ./ا.ا./ا.خ.ح.

پر ورته موضوع زموږ له آرشيف څخه يو انځوريز راپور: