شمالي کوريا بالستيک توغندی توغولی
۱۴۰۱ اسفند ۱, دوشنبه
د شمالي کوريا د رپوټونو له مخي د دوشنبې په سهار نور توغندي هم چي ويل کيږي بالستيک وه، فاير سوي دي. دغه توغندي د جاپان ساحل ته نيژدې لگيدلي دي.
د جنوبي کوريا د پوځ د اعلاميې له مخي چي د دغه هيواد د دولتي خبري آژانس له خوا خپره سوې، شمالي کوريا »د سوکچون له سيمي څخه د لنډ واټن ويشتونکي دوه بالستيک توغندي« توغولي دي.
د جنوبي کوريا د يونهاب خبري آژانس د رپوټ په حواله، شمالي کوريا وروسته اعلان وکړ «د څو دانه يې فير کولو له سيستم څخه يې دوې مرمۍ» فاير کړي دي.
د جاپان د دفاع وزارت ويلي چي دغه دواړه توغندي ختيځ سمندر ته چي د جاپان سمندر هم ويل کيږي او د کوريا نيمه ټاپو او جاپان ترمنځ موقعيت لري، رالوېدلي دي.
د يونهاب خبري آژانس رپوټ ورکوي چي د شمالي کوريا د رهبر خور، کيم يو جونگ د دوشنبې په سهار ويلي: دا په متحده ايالاتو پوري اړه لري چي شمالي کوريا څومره له آرام اوقيانوس څخه د فيرکولو د ميدان په توگه استفاده وکړي.
د توغولو پر وړاندي غبرگونونه څه دي؟
د جاپان د دفاع وزارت په دا وروستيو کي د شمالي کوريا له خوا د توغنديو توغول په کلکه غندلي دي.
دغه وزارت ويلي: «د بالستيک توغنيدو د توغولو په ګډون د شمالي کوريا دا ډول اقدامات، د جاپان، سيمي او نړيوالي سوله او ثبات له گواښ سره مخامخ کوي.« دغه وزارت زياتوي: »جاپان په کلکه اعتراض کړی او دغه اقدام يې په کلکه غندلی دی.»
د هند په حوزه او آرام سمندر کي د امريکا متحده ايالاتو رهبرۍ، د دغو توغنديو تر توغولو وروسته د جنوبي کوريا او جاپان څخه د دفاع له پاره، پر خپلي »اوسپنيزي« ژمني ټينګار کړی او زياته کړې يې ده چي په دې اړه له متحدينو سره منځگړيتوب روان دی.
د امريکا متحده ايالاتو پوځ ويلي: «په داسي حال کي چي موږ ارزيابي کړې چي دغه پيښه د متحده ايالاتو د خاوري او سرتيرو او يا هم متحدينو له پاره کوم خطر نه پيښوي، خو د دغو توغنيدو توغول، د شمالي کوريا د ډله ايزو وژنو د غير قانوني وسلو د برنامو او توغنيدو د بې ثباته کولو اغيز په گوته کوي.»
GP/NZ/AG