زيلنسکي: په لوهانسک کې پر يوه ښوونځي بريد ۶۰ ملکيان وژلي
۱۴۰۱ اردیبهشت ۱۹, دوشنبه
د اوکراين جمهور رئيس ولودومير زيلنسکي دا څرګندونې د يکشنبې په ورځ وکړې. نوموړي د «جي – اوه» غونډې ته د ويديو له لارې وويل: «پرون د لوهانسک د بیلوهوريوکا په کلي کې يوه روسي بمب۶۰ ملکيان وژلي دي.»
نوموړي زياته کړې: «هغوی د بمباريو څخه د ځان ژغورنې په موخه په يوه ښوونځي کې پناه اخيستې وه چې د روسیې د بريد هدف ګرځيدلی دی.»
د يکشنبې په ورځ د لوهانسک سيمې ګورنر سیرې ګايدی ويلي چې د بريد پر وخت په دغه ودانۍ کې کابو ۹۰ کسان موجود ول.
زياته شوې وه چې د ژغورني عملې د نويو بريدونو د ګواښ له کبله د شپې له خوا کار ونه کړای شو خو د يکشنبې په ورځ یې بيرته په کار لاس پورې کړی وو.
د م.م. د عمومي منشي غبرګون
د ملګرو ملتونو د عمومي منشي انتونيو ګوتېرش وياند د يکشنبې په ورځ وويل چې نوموړي د اوکراين په ختیځ کې په ښوونځي کې د ۶۰ تنو پر وژل کيدو سخته خواشيني څرګنده کړې ده او د ملکيانو د ساتنې غږ کړی دی.
وياند ستیفان توجارک د يوې اعلامیې په ترڅ کې وويل: «د اوکراين د بیلوهوريوکا پر ښوونځي د می د ۷مې نيټې رپوټ شوي بريد عمومي منشي سخت خواشينی کړی دی چېرې چې خلکو د روانو جګړو له کبله پناه اخيستې وه.»
ګوتېرش «په ټینګار سره ويلي چې ملکيان او ملکي زيربناوې بايد له جګړو خوندي وي» او نوموړي زياته کړې چې «په دې جګړه کې دا [بريد]يوه بله يادګيرنه ده چې په دې او ډېرو نورو شخړو کې ملکي وګړي هغه څوک دي چې تر ټولو لوړه بيه پرې کوي.»
زیلنسکي: خپله خاوره به چا ته پرې نږدو
د اوکراين ولسمشر ولودمير زيلنسکي د دويمې نړيوالې جګړې په ترڅ کې د نازي آلمان پر وړاندې د بريا د ورځې په مناسبت وويل چې هېواد به یې د روسیې پر ضد دا روانه جګړه هم وګټي او دا چې هيڅ کومه سيمه به چا ته پرنږدي.
نوموړي په يوه ليکل شوي پېغام کې ويلي: «د نازي سیسټم پر وړاندې د بري په ورځ، موږ د يوې نوې بريا له پاره مبارزه کوو. دې بريا ته د رسېدو لاره له ستونزو ډکه ده خو په دې کې هيڅ شک نه لرو چې موږ به بريالي کيږو.»
ناټو پر روسیې د اوکراين د جګړې ختمولو غږ وکړ
د ناټو عمومي مشر ينس ستولتنبرګ د نازي آلمان پر وړاندې د بريا د ورځې په مناسبت پر روسیې غږ کړی دی چې په اوکراين کې دې جګړه ودروي.
ستولتنبيرګ د آلمان د «ويلت» ورځپاڼې ته وويل: «زه د می پر ۹مه نيټه پر ولسمشر پوتين غږ کوم چې جګړه په سملاسي توګه ودروي، خپل عسکر له اوکراين څخه وباسي او د سولې مذاکرات پېل کړي. موږ په کلکه له اوکراين سره ولاړ يو او له دغه هېواد سره به د خپلې دفاع په مبارزه کې مرستې ته دوام ورکړي. »
ستولتنبيرګ دا هم ويلي چې پوتین دا ورځ په ماضي کې د لوېدیځ په اړه د درواغو د خپرول او پر ناټو ائتلاف د نيوکو له پاره کارولې ده. هغه زياته کړې چې له همدې کبله دی تمه لري چې د «ناټو او لویدیځ په اړه په ټوله کې يو ځل بيا درواغ واوري.»
ب. ص/ ن. ز (AFP, AP, dpa, Reuters)