رپوټ: آلمان ته نیږدې هر لسم پناه غوښتونکی په ویزه راغلی دی
۱۴۰۳ تیر ۳۱, یکشنبه
د «ولټ ام زونټاګ» په نامه آلمانۍ ورځپاڼې رپوټ ورکړی دی چې یو له لسو هغو کسانو څخه چې په ۲۰۲۳م کال کې یې په المان کې د پناه غوښتنلیکونه وړاندې کړي دي، پخوا المان ته په ویزې داخل شوي دي.
د دغې رسنۍ د رپوټ پر بنسټ دغه خبره په مجموع کې د ۳۵۱،۹۱۵ پناه غوښتونکو له ډلې څخه د ۳۷،۳۲۹ پناه غوښتونکو په برخه کې صدق کوي چې تیر کال یې په المان کې د پناه غوښتنې غوښتنلیکونه وړاندې کړي دي.
د دغې ورځپاڼې رپوټ، د کډوالو او پناه غوښتونکو له پاره د المان فدرالي ادارې (بامف) پر اطلاعاتو تکیه کوي.
نوموړې آلمانۍ ادارې ویلي دي چې د روان میلادي کال په لومړیو درو میاشتو کې له ۶۵،۴۱۹ پناه غوښتنلیک وړاندې کوونکو څخه ۸،۴۱۱ یې په ویزه المان ته راغلي دي.
ویل کیږي چې شاوخوا نیمایي د هغو پناه غوښتونکو چې المان ته داخل شوي دي، د سوریې، افغانستان، ترکیې او ایران هیوادونو اتباع دي.
د پناهندګۍ د مبدا په توګه لومړي دری هیوادونه المان ته د راغلو پناه غوښتونکو تر ټولو لوړ شمیر لري. ایران په پنځم مقام کې ځای لري.
آژانسونه: ش.ن/ خ.ح