روسیې د ارتودوکس کریسمس په پار موقتي اوربند اعلان کړی

دغه اوربند به د جنورۍ میاشتې د شپږمې نېټې (جمعې ورځي) له ماسپښین څخه د شنبې ورځي تر ناوخته ماخوستنه نافذ وي. دا هغه وخت دی چې ارتودوکس د کریسمس جشن لمانځي.

د روسیې د تهاجمي بریدونو راهیسې دا لومړی وار دی چې د يوه اوربند لارښوونه کيږي.

کریملین ویلي دي چې دغه اوربند د روسیې د ارتودوکس مشر پاتریارک کریل، په غوښتنه ترسره شوی دی.

دا لا معلومه نه ده چې پوتین او روسیه به واقعاً پر دغه پریکړه عمل وکړي که نه.

اوکراین تر دې دمخه د اوربند له پاره د پاتریارک کریل، غوښتنه رد کړې وه او هغه یې یوه پلمه او تبلیغاتي عنصر بللی وو.

د اوکراین د ولسمشر سلاکار میخائلو پودولیاک ویلي دي چې د روسیې د ارتودوکس کلیسا د جګړې د پروپاګنډچي په توګه عمل کوي.