راشد خان ولي خپل موټر لیلام کړی؟
۱۳۹۸ بهمن ۱۵, سهشنبه
د آسترالیا د ځنګلي اورونو له کبله سلګونه کورونه سوځیدلي، په میلیونو څاروي له منځه تللي، او لسګونه کسان پکې وژل شوي دي.
د سه شنبې په ورځ (۲۰۲۰م کال د فبروري میاشتې۴مه) د افغانستان د ملي لوبډلې لوبغاړي راشد خان چې په دې وروستیو کې یې د آسترالیا په بیګ باش سیالیو کې ګډون درلود، د دې هیواد د اور ځپلو له پاره خپل شخصي موټر لیلام ته وړاندې کړی دی.
راشد خان د آسترالیا په بیګ باش تجارتي سیالیو کې د ایډالید سټرایکر لوبډلې له پاره په دې سیالیو کې لوبې کولې. راشد خان د آسترالیا د سږکال په تجارتي سیالیو کې د خپلې لوبډلې له پاره ۱۹ ویکټې ترلاسه کړي او په دې توګه د دې سیالیو پنځم غوره ویکټ اخیستونکی دی. راشد خان په دغو سیالیو کې د خپلې لوبډلې په نفع په ۱۵ لوبو کې ۱۲۴منډې هم کړي دي.
تر دې وړاندې یو شمیر هنري څیرو او فلمي ستورو هم د آسترالیا د اور ځپلو له پاره د پیسو او چندو په راټولولو پیل کړی وو، خو دا لومړی ځل دی چې یو افغان ستوری د آسترالیا د اور ځپلو د مرستې له پاره لاس په کار کیږي. راشد خان د متسوبیشي اوټ لنډر په نامه خپل شخصي موټر لیلام ته وړاندې کړی او غواړي چې ترلاسه شوې پیسې د اور قربانیانو ته ورکړي.
راشد خان د موټر د خرڅلاو او دغه ښه فرصت په هکله پر خپله ټویټر پاڼه لیکلي: «...د دغه ښکلي موټر د ترلاسه کولو فرصت له لاسه مه ورکوئ کوم چې... د اورونو د قربانیانو له پاره خرڅلاو ته وړاندې شوی.»
د راشد خان ترڅنګ د نوموړې لوبډلې ایډالیډ سټرایکر هم د راشد خان د موټر اخیستونکي ته یو لړ ښه وړاندیزونه کړي دي. د ایډالیډ سټرایکر لوبډلې ویلي دي چې د راشد خان د موټر اخیستونکی به د خپلو ۱۱ ملګرو سره یو ځای د راتلونکی کال د بیګ باش سیالۍ په لوبغالي کې له وي آی پي یا ځانګړي ځای څخه وویني. یاد لوبډلې همدا راز ویلي دي چې دغو کسانو ته به د ۱۳۳ آسترالیايي ډالرو په ارزښت خوراک او څښاک هم د لوبې پرمهال وړاندې کړل شي.
د راشد خان اړوند میتسوبیشي یو بریښنايي موټر دی چې ارزښت یې شاوخوا ۴۷ زره او ۵۰۰ آسترالیايي ډالره ټاکل شوی دی، خو د لیلام له پاره یې ابتدايي ارزښت ۳۹ زره او ۱۰۰ آسترالیايي ډالره ټاکل شوی دی.