طالبانو ولې د الکترونيکي تذکرو بیې لوړي کړې؟

په دې وروستیو کې د طالبانو د چارو ادارې د یوې خبرپاڼې په خپرولو سره ویلي دي چې دا بیه د احصایې او اطلاعاتو د ریاست په غوښتنه لوړه شوې ده.
په تیر حکومت کې الکترونيکي تذکرې د ۲۰۰ افغانیو په بدل کې وېشل کېدې، خو د طالبانو ادارې دغه مبلغ ۳۰۰ افغانیو ته لوړ کړ. خو اوس د دې نوې طرحې پر اساس غوښتونکي باید د الکترونیکي تذکرې د ترلاسه کولو له پاره ۵۰۰ افغانۍ ورکړي.

په ننګرهار کې د تذکرې دفتر ۶۱ مامورين ولې له دندې ګوښه شوي؟
خو د افغانستان خلک وايي چې دا ډول پرېکړې خلک له تذکرې اخیستلو څخه زړه توري کوي. د کابل يوه اوسېدونکي فرهاد، دویچه ویله ته یې وویل: «زه په خپله د کورنۍ د هر غړي د تذکرې پر سر ۵۰۰ افغانۍ نه شم ورکولای. ځکه چې زما په کورنۍ کې اته غړي دي. زه دا پیسې له کومه کړم؟ حکومت باید د تذکرې اخیستو ته خلک وهڅوي او باید بیه یې راټیټه کړي، که وړیا نه وي، لږ تر لږه د چاپ پیسي دي یې واخلي.»

«د هویت د تشخیص پروګرام به افغانانو ته ستونزي جوړي کړي»

د هرات يو اوسېدونکى سردار، د الکترونیکي تذکرو د بيې پر لوړېدو د نيوکې تر څنګ د دغو پېژندپاڼو د وېش په برخه کې د اداریي بهير له ځنډه هم شکايت کوي.
نوموړي دویچه ویله ته دا وویل: «حکومت باید د دې زیاتې پیسې د ترلاسه کولو په بدل کې د الکترونیکي تذکرو د وېش په برخه کې د خلکو له پاره ښې اسانتیاوې او خدمات وړاندې کړي. د بېلګې په توګه ما خپله د پېژندپاڼې د چاپ له پاره درې میاشتې انتظار وکړ. اداري پروسه یې ډېره ورو روانه ده چې دا ډیر ځورونکی دی.»
خو په افغانستان کې د طالبانو د احصایې او اطلاعاتو ادارې چارواکي بیا وايي چې د اړتیا وړ چاپي توکو د بیې لوړیده د دې لامل شوې چې د الکترونيکي تذکرو بیه هم لوړه شي.
د طالبانو د احصایې او معلوماتو د ملي ادارې ویاند محمد حلیم رفیع دویچه ویله ته وویل: «د الکترونيکي تذکرو د بیې لوړېدل بېلابېل لاملونه لري، له یوې خوا په نړیوال بازار کې د سپینو الکترونيکي تذکرو بیه لوړه شوې ده او له بلې خوا د چاپي توکو او اکمالاتو بيه مخ پر لوړیدو ده.»
هغه همدا راز وويل: «د برېښنايي پېژندپاڼو د اداري او بايوميټريک پروسه به د تېر په څېر وي او په راتلونکي کې به هم دغه طرحه په ګاونډيو هيوادونو کې د افغانستان د سفارتونو له لارې هم عملي شي.»

د یادوني وړ ده چې د طالبانو کابینې د ماشومانو د زیږیدني کارت په ۲۰۰ افغانۍ او د لویانو په ۵۰۰ افغانی کړی دی.
او کوم کسان چې غیابي نوې تذکرې او یا تائید یې غواړي باید د ۲۰۰ ډالرو په بدل کې یې تر لاسه کړي او همدا راز د ماشومانو غیابي زیږیدني کارت هم د ۲۰۰ ډالرو په بدل کې توزیع کیږي.  
د احصایې د ملي ادارې چارواکي وايي چې تر اوسه پوري لس میلیونه افغانانو خپل برېښنايي تذکرې ترلاسه کړي او دا لړۍ به لا هم دوام وکړي.