د جرمني صدراعظمه ميرکل په کور کي قرنطين سوه
۱۳۹۹ فروردین ۳, یکشنبه
اعلان
د جرمني د حکومت وياند شتيفن زايبرت د يکشنبې په ورځ ماښام يوه خبري کنفرانس ته وويل چي هغه ډاکټر چي د جمعې په ورځ ماسپښين ئې صدراعظمي انګلا ميرکل ته وقايوي واکسين ورکړی، د کرونا ويروس آزموينه ئې مثبته ښوول سوې ده.
زايبرت وويل چي مېرمن ميرکل فوراً په کور کي د قرانطين پريکړه وکړه. هغه زياته کړه چي: «مېرکل به په راتلونکو ورځو کي په منظم ډول تيست سي، ځکه يو تيست تر اوسه پوري لا ډاډه نه وي.»
هغه وويل چي مېرمن ميرکل به دغه راز په کور کي د قرنطين پرمهال خپل رسمي کارونه کوي.
تر دې مخکي د صدراعظمي انګلا ميرکل د کابيني د ماليې وزير اولف شولڅ څو ورځي مخکي ځان په کور کي قرنطين کړی وو، خو وروسته ئې بيا د کرونا ويروس په سبب د تيست نتيجه منفي وښوول سوه.