د تخار د پيښې قربانیانو شمیر لوړ شوی دی
۱۳۹۷ مهر ۲۲, یکشنبه
د تخار ولایت ویاند د یکشنبې په ورځ (د ۲۰۱۸ کال د اکتوبر ۱۴مه) وویل چې د پارلماني ټاکنو د یوې نوماندې د ټاکنیز کمپاین پر مهال د چاودنې په پایله کې د وژل شویو کسانو شمیر ۲۲ ته لوړ شوی دی. د هغه په خبره ۳۶ تنه نور ټپیان شوي دي. د پيښې زیاتره قربانیان ملکي وګړي دي.
مخکې تر دې د ۱۲ کسانو د وژل کیدو خبر ورکړل شوی وو. د چارواکو په وینا د شنبې په ورځ هغه یوه موټر سیکل ته چې چاودیدونکي توکي په کې ځای پر ځای شوي ول د پارلماني کانديدې نفیسه یوسیفي بیګ د ټاکنیز کمپاين پر مهال د هغې د پلویانو په منځ کې چاودنه ورکړل شوه. اغلې یوسیفي بیګ ته په دې پيښه کې زیان نه دی رسیدلی.
افغانان د اکتوبر میاشتې په ۲۰ نیټه نوی پارلمان ټاکي. تیره اونۍ د ټاکنیز کمپاين د پیل راهیسې دغه غونډې د بریدونو هدف ګرځول شوي دي. د انتخاباتو د کمیسیون په حواله تر اوسه پورې د پارلماني ټاکنو ۹ نوماندان وژل شوي دي.
څو ورځې مخکې طالبانو د پارلماني ټاکنو نوماندانو ته خبرداری ورکړی وو چې له خپل کاندیداتورۍ تیر شي. طالبانو دغه ټاکنې د «امریکایانو شومه دسیسه» بللې وه او پر ټاکنیزو مرکزونو او ګډون کونکو یې د بریدونو ترسره کول اعلان کړي ول.