د آذربايجان او ارمنستان ترمنځ نښتې شوي
۱۴۰۱ شهریور ۲۲, سهشنبه
د ارمنستان او آذربایجان ترمنځ د دوشنبې په ماښام يو ځل بيا جګړه پارېدلې ده. په دې ترڅ کې دواړو اړخونو يو پر بل د درنو وسلو کارولو خبرونه ورکړي دي.
دا جګړه په آذربايجان کې د پرتې سيمې ناګورني قره باغ په هغه برخه کې پېل شوه چې په خټه ارمني بيلتون غوښتونکو په ۱۹۹۱م کال کې جلا کړې وه او بيا یې د يوه جلا جمهوريت په توګه اعلان کړې وه. تر دې پېښې وروسته دې سيمې ته د آرت ساخ نوم ورکړل شوی وو.
د سې شنبې په سهار وختي د ارمنستان د دفاع وزارت يوه وياند آرم توروسيان د يوې مطبوعاتې غونډې په ترڅ کې وويل چې د جګړې د دوام له کبله وضعيت «ډېر ترنګلی» دی.
د انترفکس خبري آژانس په حواله د ارمنستان لومړي وزير نیکول پاشينيان ويلي دي چې له آذربايجان سره د شپې له خوا په ترسره شويو نښتو کې د ارمنستان ۴۹ پرسونل وژل شوي دي. د ارمنستان پارلمان ته د وينا پر وخت نوموړي وويل چې آذربايجان د شپې له خوا پر ارمني پوستو بريدونه پېل کړل او دغه بريدونه لا ادامه لري.
يو پر بل د پارونې تورونه
دواړو هيوادونو ادعا کړې ده چې د مخالف لوري له خوا یې تر پارونې وروسته په متناسب عمل لاس پورې کړی دی.
آذربایجان وايي ارمنستاني ځواکونو مو یو سرتيری وژلی
د ارمنستان دفاع وزارت په خپله اعلاميه کې زياته کړې: «دوشنبه د شپې تقريباً تر يوې بجې وروسته آذربایجان د توپونو او ډېرې وړتيا لرونکو وسلو په مرسته د ګورس، سوتک او جرموک ښارونو پر لور د ارمنستان پر پرتو پوځي پوستو شديد فايرونه پېل کړل.»
خو آذربايجان بيا د ارمنستان پر پوځ دا تور لګولی چې دوشنبه د شپې یې پر دشکيسان او کيلبازار سيمو کې او همدا راز لاشين ته نزدې یې پر ماينونو خښولو سربیره «په پراخه کچه ويجاړونکي عمليات هم پېل کړي.»
د آذربايجان دفاع وزارت په خپله اعلاميه کې زياته کړې ده پوځونو یې د ارمنستان د پوځونو د پارونې په مقابل کې يوازې په سيمه ایزه کچه ځواب ورکړی دی او موخه یې د هغه پوځي تجهیزاتو او وسایلو په نخښه کول وو چې د فايرونو له پاره کارول کيدل.»
دواړو هېوادونو په دې نښتو کې د خپلو عسکرو د وژل کیدو اعتراف هم کړی دی.
د ارمنستان پوځ ويلي دي چې دوی د بريد په ځواب کې «متناسب» عمل کړی دی خو د آذربايجان د دفاع وزارت ويلي دي چې پر پوځ یې «د ارمنستان د مختلفو پوځي قطعاتو له خوا د هاوان په ګډون د هر ډول وړتيا لرونکو تجهیزاتو له لارې شديد فایرونه شوي دي.»
د ناګورني قره باغ پخوانۍ شخړه
په ناګورني قره باغ سيمه کې چې په دې وروستيو لسیزو کې یې پر سر د آذربايجان او ارمنستان ترمنځ دوه جنګونه شوي دي، په خټه ارمنيان اوسي.
دا سيمه مخکې د آذربايجان په ولکه کې وه خو بيا کابو تر ديرشو کلونو پوري د آرمني بیلتون غوښتونکو ترکنترول لاندې وه. خو د ۲۰۲۰م کال د شپږو اونيو جګړې وروسته آذربايجان د سيمې پر ډېره برخه بيرته ولکه ټینګه کړه او بيا د روسیې په منځګړيتوب د اور بند تر تړون وروسته دا سيمه آذربايجان ته وسپارل شوه.
تېره اوونۍ ارمنستان پر آذربايجان تور ولګاوه چې د ډزو د تبادلې پر وخت یې د دغه هېواد يو عسکر وژلې دی خو آذربايجان وايي چې په دې وروستيو مياشتو کې د ارمنستان پوځ هم د دوی عسکر هدف ګرځوي.
ب. ص/ ن. ز (dpa, afp, Reuters)
زموږ له آرشيف څخه: