بلخ کې چاودنه؛ دوه کسان وژل شوي او ۱۲ خبریالان ټپیان دي

ځايي رسنیو او خبریالانو لیکلي، چې دغه چاودنه نن شنبه تر غرمې مخکې پر شاوخوا یولسو بجو د مزار شریف په دویمه امنیتي حوزه کې د تبیان په نوم یوه فرهنګي مرکز کې د خبریالانو د یوې ناستې پر مهال شوې ده.

 ویل شوي، غونډې کې د اهل تشیع یو شمېر دیني عالمانو او د طالبانو ادارې یو شمېر چارواکيو هم ګډون کړی و.

تر اوسه د طالبانو ادارې د دې چاودنې په اړه جزئیات نه دي ورکړي.

له بلخ ولایت څخه یو خبریال فرید فیصل دویچه ویله ته وویل، دغه چاودنه په تبیان فرهنګي مرکز کې چې د آوا په نوم خبري اژانس دفتر هم پکې دی شوې، چې دوه ملکي وګړي پکې وژل شوي او ۱۲ خبریالان ټپيان دي.

یوه بل خبریال رفیع حیاتي بیا دویچه ویله ته وویل، چې نننۍ چاودنې کې د تبیان فرهنګي مرکز دوه کارکوونکي وژل شوي او ډېر شمېر خبریالان ټپيان دي، چې روغتونونو ته لېږدول شوي دي.

يونسکو: د خبريالانو وژنې مخ پر زياتېدو دي

ویل شوي، دغې مرکز کې د خبریالانو د ستاینې غونډه روانه وه. تر اوسه د چاودنې څرنګوالي په اړه هم ډېر جزئیات نه دي ورکړل شوي.

طلوع نیوز خبري تلویزیوني شبکې لیکلي، چې د بلخ په نننۍ چاودنې کې یې خبریال عزیز الرحمان ابرام هم برسیرن ټپي شوی او دغه راز پژواک خبري اژانس هم د خپل خبریال عبدالصبور سیرت د ټپي کېدو خبر ورکړی دی.

بريتانيا د څو افغان خبریالانو پر انتقال له سره فکر کوي

دا په روانه اونۍ کې دویېمه چاودنه ده، چې بلخ کې مرګ ژوبله اړوي.

دوه ورځې وړاندې د بلخ ولایت مقام کې دننه یوه ځانمرګي برید کې د دغې ولایت له پاره د طالبانو والي داود مزمل له خپلو دوو ساتونکیو سره وژل شوی و.

تر دې دمه د بلخ د نننۍ چاودنې پړه کوم چا یا کومې وسله والې ډلې پر غاړه نه ده اخستې؛ خو پر والي داود مزمل د ځانمرګي برید مسئولیت داعش وسله والې ډلې منلی.