افغان فلم «حوا، مريم او عايشه» د ونيز په نړيوال فيستوال کې
۱۳۹۸ شهریور ۱۶, شنبه
د «حوا، مريم او عايشې» فلم چې د افغانستان د سينما محصول دی، د جمعې په ورځ (د ۲۰۱۹ کال د سپتمبر ۶مه) د ايتاليا د ونيز نړيوال فلمي فيستيوال کې نندارې ته وړاندې شو. د فلم دايرکتره صحرا کريمي، آرزو آريا چې په دغه فلم کې ېې د حوا رول لوبولی او کتايون شهابي چې د فلم له جوړونکو څخه يوه ده، د فستيوال پر سور فرش باندې وګرځیدې. صحرا کريمې په دې اړه دویچه وله ته وويل: «دغه فلم پنځه نندارې لري چې لومړنۍ دا يې د فلم نړيواله ننداره د سپتمبر په ۶مه ده.»
حوا، مريم او عايشه د صحرا کريمي لومړنی فلم دی چې د لوړ داستان څخه برخمن دی. په دغه فلم کې په افغانستان شته رايجو ستونزمنو دودونه، تر ډيره د ښځو اړوند ستونزې ښودل شوي دي. ميرمن کريمي په دغه فلم کې په ځانګړې توګه د درو ښځو چې د ټولنې له درو متفاوتو طبقو څخه دي، ژوند يې پر انځور راوښکلی دي.
دغه فلم د ناامنيو او جګړو په شتون کې د کابل په واټونو او کوڅو کې ډک شوی دی. په دغه فلم کې د هغو ښځو ژوند په انځور شوی چې په خاص ډول په يو مردسالاره ټولنه کې څومره د دې اختيار لري چې مور شي او يا سقط جنين وکړي.
دغه فلم د ايتاليا په ونيز نړيوال فستيوال کې د ګڼ شمير ګډونوالو او نامتو نړيوالو هنرمندانو له خوا وستايل شو. له دې ډلې څخه د هاليوود مشهورې هنرمندې انجلينا جولي له دغه افغان فلم څخه ملاتړ کړی دی.
د فلم دايرکټره، صحرا کريمي وايي چې د حوا، مريم او عايشې فلم د دغه فيستوال په رقابتي څانګو له پاره هم نوماند شوی دی. هغې وويل: «د فلم ستايل د هر دايرکټر غوښتنه وي، خو دا چې زما فلم وتوانيد يو لوی فستيوال ته لاره پيدا کړي، زما فلم او افغانستان له پاره يوه بريا ده.»
د ونيز په نړيوال فلمي فيستيوال له پاره يو بل لنډ افغانی فلم چې د ديانا ثاقب په دايرکټرۍ جوړ شوی، هم انتخاب شوی دی. دغه افغان فلمونه د سلونو فلمونو له منځه انتخاب شوي دي. هرکال د ايټاليا د ونيز نړيوال فلمي فستيوال کې له ۵۰۰۰ ډیر فلمونه استول کيږي چې د هغو له منځه يوازې ۱۵۰ فلمونه د نندارې له پاره انتخابيږي. په پام کې ده چې د صحرا کريمي فلم پنځه ځله په لوي سالون کې وښودل شي.
ش ا/م ک ص/ ا ا