امریکايي ځواکونه له افغانستانه ووتل؛ طالبان خپله بریا لمانځي

طالبانو له کابل څخه د امریکا د وروستيو ځواکونو په وتلو د وسلو په ډزو سره خپله بریا ولمانځله او د کابل هوايي ډګر کنټرول يې په خپل لاس کې ونیوه.

رويټرز خبري آژانس خپل د سه شنبې ورځې په رپوټ کې وايي چې د کابل آسمان د طالبانو د خوښيو ډزو غږونو او انګازو پر سر اخیستی وو.

امریکايي ځواکونو په ۲۰۰۱م کال کې پر افغانستان حمله وکړه، د طالبانو رژيم يې ړنګ کړ او تر هغه شل کاله وروسته طالبانو بیرته د افغانستان واک ترلاسه او امريکايي قواوې او د دوی متحدین له افغانستان په بشپړ توګه ووتل.

که له ېوې خوا طالبان د دغې جګړې بریا لمانځي له بل لورې امریکا وايي چې له افغانستان څخه يې د خپلو ټولو ځواکونو په ايستلو سره خپله تر ټولو اوږده جګړه پای ته ورسوله.

د یو بل رپوټ له مخې په کابل کې د امریکا متحده ایالاتو سفارت خپل فعاليت په تعلیق کې راوستلي او ویلي دي چې خپل کارونه به له قطر څخه کوي.

له دې سره طالبانو د سه شنبې په ورځ د کابل نړيواله هوايي ډګر کنټرول په بشپړه توګه په خپل لاس کې نیولی دی.

اسوشتید پريس له کابله ليکي چې طالبانو د هوايي ډګر ځغاستلیکه کې خپلو سيمبوليکو حرکاتو سره خپله بريا لمانځي او خوشالیانې کوي.

د طالبانو ویاند ذبیح الله مجاهد په ژوندۍ بڼه یوه خپور شوي پيغام کې وويل: «نړۍ باید خپل درس زده کړی وي او زموږ له پاره د بریا تر ټولو خوندوره صحنه ده.»

مجاهد دغه راز د بدر په نوم د یوې قطعې راټولو شوو غړو ته په خطاب کې وويل: «زه هیله لرم چې تاسو به د ملت سره ډير محتاط اوسئ.» هغه په خپلو خبرو کې وويل: «زموږ خلک له جګړې ډير درديدلي او خلک له دې زیات نور نه غواړي وکړيږي.» د مجاهد د خبرو په پای کې بدرې قطعې د «الله اکبر» نعرو په ویلو سره خپلې خوشاليانې ولمانځلې.

مجاهد وروسته د الجزيرې عربي چینل سره په خبرو کې وويل چې کابل امن دی او د سرپرست حکومت جوړولو خبره يې رد کړه.

هغه وويل: «کابل به امن وي او خلک دې انديښنه نه کوي.»

ذبیح الله مجاهد د افغانستان له ملي تلویزیون سره په یوه بله مرکه کې وويل چې د هوايي ډګر د عملياتو د بیا پيل په اړه هم بحث شوی تر څو د هغو کسانو له پاره چې بهر تلو ته منتظر دي، لار هواره شي. مجاهد زیاته کړه: «زموږ تخنيکی پرسونل به په هوايي ډګر کې هغه لوژستيکي او تخنيکی معاینات ترسره کړي چې ورته اړتیا ده.»