الشباب په نایروبي کې پر یوه هوټل برید کړی
۱۳۹۷ دی ۲۵, سهشنبه
د سایت په نامه استخباراتي ډلې چې د جهادي ډلو فعالتونه څاري نن د سې شنبې په ورځ ویلي چې د کینیا په پلازمینه نایروبي کې پر یوه هوټل باندې د برید مسوولیت الشباب اسلام پالې ډلې منلی دی.
له القاعدې ډلې سره اړیکې لرونکې الشباب، په دې ډلې پورې تړلي خبري آژانس ته ویلي چې دوی په نایروبي کې د «ډوسیټ ډي ۲» په نامه هوټل باندې برید کړی. دغه برید د کینیا په غربي برخه کې شوی دی. د معلوماتو له مخې د برید پرمهال د ډزو او چاودنو غږونه هم اوریدل شوي دي.
امنیتي ځواکونه اوس سیمې ته رسیدلي دي خو لا تر اوسه پورې د تلفاتو په اړه کره معلومات په لاس کې نه شته.
په کینیا کې وخت نا وخت الشباب ډله دغه راز بریدونه کوي. په ۲۰۱۳م کال کې د کینیا په یوه بازار کې د الشباب ډلې په یوه برید کې لسګونه کسان ووژل شول. د دې ترڅنګ د کینیا پر یوه پوهنتون باندې د یادې ډلې په یوه بل برید کې نزدې ۱۵۰ زده کوونکي وژلي وو.