اتریش: د مهاجرو د حامل موټر د اوښتو په پیښه کې مهاجر مړه شوي
۱۴۰۱ مرداد ۲۲, شنبه
رپوټونه وايي چې پېښه د هنګري سرحد ته نژدې د اتریش د بورګينلند ایالت پر لويه لاره رامنځ ته شوې ده.
فرانس پریس خبري آژانس د اتریش حکومتي خبري آژانس APA په حواله لیکي چې په موټر کې د ښځو او ماشومانو په ګډون، شاوخوا ۲۰ کسان سپاره ول او هغه وخت واوښته چې د لارۍ چلوونکي هڅه کوله د اتریش لور ته د پولیسو د تلاشۍ له ېوې پوستې څخه وتښتي.
سرچينه زياتوي په پېښه کې یوه ښځه او دوه نارينه مړه شوي، ګڼ شمیر نور سخت ژوبل دي او د لارۍ چلوونکی نيول شوی دی.
دا اتريش د کورنيو چارو وزارت په مې میاشت کې اعلان کړی وو چې پولیسو د قاچاق وړونکو يوه داسې ډله متلاشي کړې چې باور ورباندې کېده په لسونو زره کسان، چې په هغو کې ډيری ېې سوريایان ول، له هنګري څخه اتریش ته انتقال کړي دي.
تر دې مخکې هم په اتریش کې په غیرقانوني توګه د مهاجرو د انتقال په بهیر کې مرګونې پېښې رامنځ ته شوي دي.
تیرکال د اتریش په سرحدي علاقه کې په یوه لارۍ کې دوه مړي موندل شوي ول چې د هوا د کمښت له وجې مړه شوي ول. دغې پېښې د ۲۰۱۵م کال د هغې پيښې ياد تازه کړ چې د ېوې لارۍ په کابین کې ۷۱ کسان د هوا د نشتون له کبله مړه شوي ول. دغه مهاجر د افغانستان، عراق او سورېې څخه ول چې قاچاقبرانو د لارۍ په کابين کې بند کړي ول پرته له دې چې خبر ېې واخلي.