آلمان او فرانسې ایتوپیا ته د نژدې همکارۍ لاس غځولی دی
۱۴۰۱ دی ۲۲, پنجشنبه
د جرمني خارجه وزیري انالینا بیربوک چي نن پنجشنبه سهار یې د دوو ورځو له پاره دغه هیواد ته سفر کړی دی، وویل دا مهمه ده، چي اروپا اوس «خپل مخ چټک ښکاره» کړي.
د زرغون ګوند دغه سیاستمداره د افریقا د ښکر دغه هیواد ته د فرانسې د خارجه وزیري، کاترینا کولونا سره یوځای تللې ده.
د ایتوپیا حکومت په تیر نومبر میاشت کي د تیګري د آزادي بخښونکي ولسي غورځنګ سره د سولي یو قرارداد امضا کړ. د ملګرو ملتونو د ارقامو پراساس د ۲۰۲۰م کال په نومبر میاشت کي د جنګونو له شروع کیدو راهیسي هلته په سلونو زره انسانان مړه سوي دي.
له ایتوپیا څخه د دغي لیدني کتني بل پسمنظر او دلیل په اوکراین کي د روسیې جنګ دی، د کوم په واسطه چي د غذايي موادو بحران رامنځته سوی او همدارنګه د چین مخ پر ډیریدونکي هغه کوښښونه دي چي غواړی پردغه هیواد باندي خپل نفوذ پراخ کړي.
د تقریبأ ۱۲۰ ميلیونه نفوس په درلودلو سره ایتوپیا تر نایجریا وروسته د افریقا یو تر ټولو پر نفوسه او په عین حال کي د جهان یو تر ټولو غریب هیواد هم دی.