په کابل کي یو بریتانوی د شرابو د خرڅلاو په تور محکمه سوی
۱۴۰۰ خرداد ۱۳, پنجشنبه
د ستري محکمې یوه ویاند د چهارشنبې په ورځ خبر ورکړ چي محکمه داسي ثبوتونه لري چي نوموړي کس د نورو ترڅنګ د یوې لوژیستیکي کمپنۍ تر نامه لاندي څه د پاسه ۱۲۰۰ لیټره شراب خرڅ کړي وي. د هغه حکم لا نه دی نهايي سوی.
په افغانستان کي د شرابو لرل، څښل او خرڅلاو منع دي. خو بیا هم په دغه هیواد کي يې خرڅلاو ته په پراخه پیمانه تور بازارونه موجود دي. د یوې قُطعۍ اروپايي بیر بیه لس امریکايي ډالرو ته رسیږي. او د یوه بوتل وارد سوي وودکا بیه تر۵۰ امریکايي ډالرو زیاته ده.
د ستري محکمې ویاند زیاتوي چي نوموړی بریتانوی اوس په بندیگرت کي دی. خو بیا یې هم د هغه د دقیق ځای په اړه معلومات ور نه کړل.
په کابل کي له مخدره موادو سره د مبارزې له پاره یوه ځانگړې توقیف خانه سته چي د امریکا متحده ایالاتو په پیسو جوړه سوې ده. اوس لته د هیروینو قاچاقبران ناست دي. خو په کابل کي تر ټولو لوی محبس پلچرخي دی چي پکښي سخت جنایتکاران او طالب جنگیالي بندیان دي.
د بشري حقونو سازمانونو په وار وار سره د افغان بندیانو پر خراب وضعیت باندي انتقادونه کړي.
د روان کال د مارچ مياشتي په سر کي هم یو بریتانوی د شرابو د قاچاق په تور په کابل کي بندي سو. ویل کیږي چي نوموړی چي د «Milchmann» یا د شیدو سړی په نامه مشهور وو، وزیرانو او د پارلمان غړو ته هم شراب انتقالول.
د کابل د پولیسو په حواله د دغه کس په نیولو سره څه د پاسه ۲۰۰۰ بوتله شراب او یو زرې موټر هم ظبط سوي چي په مرسته به یې نوموړي بریتانوي شراب انتقالول.
GP/NZ/AG