په افغانستان کې د پولیو دریمه پیښه ثبت سوې
۱۴۰۲ خرداد ۵, جمعه
دا په تېره یوه اوونۍ کې په افغانستان کې په ۲۰۲۳م کال کې د پولیو دریمه پېښه ثبت سوه.
د طالبانو د عامې روغتیا وزارت خبرداری ورکوي چې د افغانستان ختیځې سیمې او په ځانګړې توګه د دې سیمې د ننګرهار ولایت په ماشومانو کې د پولیو یا ګوزڼ د خپریدو له جدي خطر سره مخامخ دی او په ککړو اوبو او ککړ چاپېریال کې د پولیو د ويروس چاپېریالي نمونې ثبت سوي دي.
په نازيانو ولسوالۍ کې چېرې چې د پوليو دغه مثبته پېښه ثبت سوې، د حفظ الصحې وضعيت پکې خراب ښودل سوی دی.
اړوند مطالب:په افغانستان کې د ګوزڼ د دو مثبتو پيښو ثبت او د واکسیناسيون د کمپاین پیل
د طالبانو د عامې روغتیا وزارت د افغانستان په ختیځو ولایتونو کې د واکسین د پروګرام د پیاوړتیا غوښتنه کړې ده.
تېر کال په پکتیکا او کونړ ولایتونو کې د پولیو دوه مثبتې پېښې ثبت سوې وې، چې دا په ۲۰۲۱ کال کې د ثبت سویو ۴ پېښو او په ۲۰۲۰ کال کې د ۵۶ پېښو په پرتله د پام وړ کموالی ښيي.
اړوند مطالب:آیا لاهم افغانستان کې د پولیو ضد واکسین سره مخالفت کیږي؟
سره له دې چې د پولیو واکسین کمپاین پیل سوی، لا هم پر دې ویروس د ککړيدو کیدو خطر شتون لري.
افغانستان او پاکستان د نړۍ د هغو ډېرو لږو هېوادونو په ډله کې دي چې د ګوزڼ یا فلج ناروغۍ ویروس پکې اوس هم نه دی ختم سوی.
پوليو يا ګوزڼ يوه ساري ناروغي ده چې د ماشومانو د دايمي فلج او يا حتی د مرګ لامل کېږي. په ځانګړې توګه په کوچنیانو کې د دې ناروغۍ دایمي زیانونه پاتې کيږي. د پولیو دا ناوړه ویروس اکثرا د ککړو اوبو له لارې خپریږي.