تاجیکستان تر ۱۰۰ زرو افغان مهاجرو ته د ځای ورکولو تياری نيسي
۱۴۰۰ مرداد ۱, جمعه
د تاجیکستان یوه جګپوړي حکومتي چارواکي د جمعې په ورځ (۲۰۲۱م کال د جولای ۲۳) وویل چې هیواد یې اوس له افغانستان څخه د احتمالي ۱۰۰ زره مهاجرو د منلو له پاره په امادګیو بوخت دی.
د تاجيکستان د بېړنیو پیښو کمېټي مرستیال امام علي ابراهیم زاده، په یوه خبري غونډه کې وویل چې تاجیکستان له وړاندې نه پولې ته نیږدې په ګورنو بدخشان ولایت او خلطون کې د مهاجرو له پاره د مرستندویه توکو په ذخیره کولو پیل کړی دی.
دا په داسې حال کې ده چې د همدې میلادي میاشتې په لومړیو کې په سلهاوو افغان ځواکونه له خپلو سیمو پر شا شوي ول او د طالبانو د بریدونو له ویرې تاجیکستان ته اوښتي ول. د تاجیکستان د چارواکو په خبره، دغه ټول سرتیري بیرته افغانستان ته انتقال شوي دي.
په افغانستان کې په دې وروستیو کې د امنیتي ځواکونو او طالبانو ترمنځ جګړو شدت موندلی او ګڼ شمیر ولسوالۍ د طالبانو لاس ته لویدلي چې له کبله یې زرګونه کورنۍ په هيواد کې دننه بې ځایه شوي دي. د افغانستان ګاونډي هیوادونه د وضعیت د لا خرابیدو په پایله کې د مهاجرت له یوې بلې څپې ویره لري.