طالبانو بیا یوولس کسانو ته علني سزا ورکړې
۱۴۰۱ بهمن ۲۸, جمعه
د طالبانو ادارې د سترې محکمې د اعلامیې له مخې، دغه کسان په اخلاقي فساد او نامشروع اړیکو تورن ول چې نن جمعه (۲۰۲۳م کال د فبرورۍ ۱۷) په عام محضر کې سزا ورکړل شوه.
په اعلامیه کې راغلي: «د تعزیري جزا دا حکم نن د جمعې تر لمانځه وروسته شاوخوا ۱:۳۰ بجه د متنفذینو، عالمانو، پوهانو او د بدخشان ولایت پوځي او ملکي چارواکو په وړاندې د مجرمینو د هستوګنې ځای د فبض آباد ښارد ۷مې ناحیه بتاش کلي کې تطبیق شو، ترڅو دوی او نورو ته عبرت وګرځي.»
د سترې محکمې په اعلامیه کې ادعا شوې چې د تورنو قضیې ځايی ښاري محکمې څیړلي او هغوی پر کړې پریکړه قناعت درلود.
اړوند مطالب:طالبانو په لوګر او لغمان کې ۱۴ نارينه او ښځې په دُرو وهلي
طالبانو د خپلي واکمنۍ په دویم دور کې بیا علني سزاګانې پيل کړي چې په دې لړ کې یې ان یو کس څه موده وړاندې په فراه ولایت کې قصاص هم کړ.
که له یوې خوا د طالبانو د عدلي تعقیب او د درې ګونو محکمو پړاوونه په خپلواکه توګه نه څارل کیږي، له بل لوري د طالبانو دا کړنې د نړېوالو بشري حقونو بنسټونو له خوا هم تر کلک انتقاد لاندې دي.