د آلمان د پوځي بودجې نوی ريکارډ
۱۳۹۹ بهمن ۲۰, دوشنبه
د آلمان فدرالي حکومت، د ۲۰۲۱م کال دفاعي بودجه په بیساري ډول لوړه کړې او د خپل دغه تصمیم په اړه يې ناټو ته هم خبر ورکړی دی.
د آلمان د يو تلویزيون «ټاګ شو» خپرونې د يکشنبې ورځې د رپوټ په حواله، هغه بودجه چې د آلمان فدرالي حکومت په بروکسل کې د ناټو مرکزي دفتر ته اعلان کړې، څه باندې ۵۳ ميليارده یورو ده.
په دې ترتيب د آلمان سږنۍ دفاعي بودجه، د تيرکال په پرتله، چې ۵۱ ميليارده او ۳۹۰ ميليونه یورو وه، ۳ اعشاريه ۲ ميليارده يورو زياته شوې ده.
د ناټو د مرکزي دفتر لوړپوړي چارواکي هیله مند دي چې د آلمان په څير هیوادونو د دفاعي بودجې په ډيريدو سره به د ناټو سازمان د غړو هیوادونو تر منځ د دغه سازمان د بهرنۍ دفاعي بودجې د عادلانه تقسیم پر سر جنجالونه لږ شي.
د ناټو عمومي منشي، ينس ستولتنبرګ، په کراتو ويلي چې هغه ګومان کوي چې جو بایدن باید د امریکا متحده ايالاتو د نوي ولسمشر په توګه د خپل کار په پيليدو سره، په دې برخه کې د واشنګتن د فشارونو پر ادامې باندې حساب وکړي.
هغه د نوي میلادي کال د پيل په مناسبت، د آلمان خبري آژانس سره په مرکه کې ويلي ول چې د امریکا ولسمشرانو په تيرو څو لسيزو کې د اروپايي هيوادونو د دفاعي بودجې د لوړولو له پاره هڅې کړي، او جوبايدن خو حتی د امریکا د ولسمشرۍ په انتخاباتو کې تر بريالي کيدو دمخه له اروپايي هیوادونو څخه غوښتي ول چې په دفاعي برخه کې لا ډيره پانګونه وکړي.
د دونالد ترمپ د ولسمشرۍ په دوره کې د ناټو سازمان د اروپايي غړو د دفاعي بودجې د لوړولو په برخه کې د امریکا فشارونه په شدت سره ډير شول.
ترمپ د ناټو سازمان د ۲۰۱۸م کال په سرمشريزه کې ګواښ کړی وو چې که د ناټو سازمان غړي د شوي توافق له مخې خپل دوه سلنه داخلي ناخالص تولیدات پوځي بودجې ته بیل نه کړي، امریکا به له دغه تړون څخه ووځي.
د شمالي اتلانتيک تړون غړي هيوادونه په ۲۰۱۴م کال کې ژمن شول چې خپله دفاعي بودجه به د داخلي ناخالص تولیداتو دوې سلنې ته پورته کوي.
د کرونا بحران څخه دمخه داسې تمه کیده چې د آلمان پوځي بودجه د داخلي ناخالص توليد ۱،۴۲ سلنه وي خو د کرونا وبا په دليل په عمومي عوایدو کې د کمښت له وجې دغه نسبت لوړ شوی دی.
د آلمان فدرالي حکومت په نظر د ۲۰۱۴م کال توافقاتو له مخې بودجوي سهم بندي، نامناسبه ده او د بودجې د تعينولو عامل باید تل د هغو لګښتونو له مخې وي چې د پوځي سکتور په اختیار کې ورکول کيږي.
دویچه وله ف/م.ک.ص./ن.ز.
پر ورته موضوع زموږ له آرشيف څخه يو انځوريز البوم هم کتلی شئ: