د مینه پال جنازه، د هدفي وژنو پر دوام توندې نېوکې
۱۴۰۰ مرداد ۱۶, شنبه
د افغان حکومت د اطلاعاتو او رسنیو مرکز مشر دواخان مینه پال جنازې ته د پارلمان د غړو سربیره یوشمېر جګپوړي دولتي چارواکي هم ورغلي وو.
د جنازې ګډونوالو په توندو ټکو حکومت وننګاوه چې څنګه په رڼا ورځ د پلازمینې په زړه کې د یوه جګپوړي دولتي چارواکي وژونکي ترې تم شي.
د دواخان مینه پال ورور عبدالمجید مینه پال خبریالانو ته وویل، چې دا یې د کورنۍ پنځم غړی دی چې د وسله والو مخالفینو په لاس وژل کیږي.
نوموړي زیاته کړه:
«مینه پال زما ورور و خو مبارزه یې د یو فرد په توګه نه بلکې د ټول افغانستان لپاره وه او له دولت څخه مو غوښتنه داده چې دده د قتل د عاملانو په نیولو کې جدا اقدام وکړي.»
دوا خان مینه پال د جمعې په ورځ (د ۲۰۲۱ میلادي کال د اګست ۶مه) د کابل په دارلامان سیمه کې په یوه هدفي برید کې ووژل شو. طالبانو ددغه برید مسؤلیت پرغاړه اخېستی.
د ولسي جرګې یوشمېر غړي وايي، د حکومت بي غوري لامل شوې چې په هېواد کې هدفي وژنې دوام لري.
ددې جرګې یوه غړي میرزا کټوازي خبریالانو ته وویل:
«دولت هروخت بې توجه يي کړې، مونږ بیا په دولت غږ کوو، که چېرې هغه څوک چې مینه پال صاحب یې په قتل رسولی پيدا یې نه کړي او د قانون منګولو ته یې ونه سپاري ددغسې نورو مرګونو به هم شاهدان وو.»
شاوخوا څلویښت کلن دوا خان مینه پال د افغانستان د زابل ولایت اوسېدونکی ؤ، چې کلونه وړاندې یې له یوشمېر رسنیو سره د خبریال په توګه دندې ترسره کړي.
نوموړی د ولسمشر غني مرستیال ویاند ؤ او څو میاشتې وړاندې د حکومت د اطلاعاتو او رسنیو د مرکز د مشر په توګه ګومارل شوی ؤ.
د ولسمشر د ستراتيژيکو اړیکو د دفتر مشر وحید عمر د مینه پال په جنازه کې د هغه کورنۍ ته ډاډ ورکړ چې په دې اړه به اقدامات کوي.
«د دوا خان مینه پال همفکران به هرو مرو د هغه لاره تعقیبوي.»
طالبان داسې مهال د پلازمینې کابل په زړه کې د حکومت یو جګپوری چارواکی وژني، چې دې ډلې له ولسوالیو وروسته اوس په سترو ښارونو هم برېدونه پيل کړي.
طالبانو ادعا کړې چې د نیمروز مرکز زرنج ښار وروسته یې د شبرغان ښار هم نېولی دی.
امریکا په افغانستان کې د تاوتریخوالي له ډېرېدو اندېښنه ښودلې او طالبانو ته یې خبرداری ورکړی چې د بریدونو په ډېرولو سره نړېوال مشروعیت نه شي ترلاسه کولای.
اسماعیل شاکر – کابل