په کابل کې وسله والو دوه قاضيانې په ډزو وژلې دي
۱۳۹۹ دی ۲۸, یکشنبهاعلان
دغو دواړو ښځينه قاضيانو د افغانستان په ستره محکمه کې کار کاوه. موټر چلونکی يې په بريد کې ټپي شوی دی. د کابل پوليسو هم دغه پېښه تائيد کړې ده، خو د بريد پړه تر اوسه چا نه ده منلې.
د افغان حکومت او وسله والو طالبانو تر منځ د سولې د خبرو سره سره په دې وروستيو کې بريدونه ډېر شوي دي. په تېره په پلازمېنه کابل کې سياستوال، خبريالان او د بشري حقونو فعالان د تندلارو له خوا په نښه کيږي.
په تېرو څو اوونيو کې هم په وار وار مشهورې څېرې او وتلي کسان د سهار له خوا په خپلو موټرو کې د کاري دندو په لار ووژل شول.
څو ورځې مخکې په مزار شريف ښار کې هم د ملي پوځ درې تنه ښځينه منسوبانې د نامعلومو وسلوالو له خوا هغه وخت ووژل شوې چې دندې په لاره وې. په دغې پيښې کې يوه بله ښځينه منسوبه او د هغوی موټرچلونکی ټپي شوی وو.