ولسمشر غني ولې په دوحه کې د مذاکراتو له دوام سره هوکړه وکړه؟
۱۳۹۹ دی ۸, دوشنبه
افغان حکومت وايي، د سولې مرکچې پلاوي او ملي روغې جوړې شورا د مشرانو د غوښتنې پر بنسټ ولسمشر هوکړه کړې ده، چې د مذاکراتو راتلونکي پړاو دې هم په قطر کې ترسره شي.
د ولسمشر غني وياند صديق صديقي پر خپله ټويټرپاڼه ليکلي: «د نړېوالو ملاتړ کوونکو په مشوره او د مذاکراتو د دويم پړاو د ځنډېدو د مخنيوي په موخه د افغانستان ولسمشر توافق وکړ چې د مذاکراتو بل پړاو دې په قطر کې وشي.»
ښاغلي صديقي زياته کړې چې حکومت لاهم په افغانستان کې دننه د مذاکراتو د نورو پړاوونو ترسره کېدو پر غوښتنه ولاړ دي.
د طالبانو او افغان حکومت مرکچې پلاوو ترمنځ د شوي هوکړي له مخې، د سولې خبرو دويم پړاو بايد د راتلونکې ۲۰۲۱م کال د جنورۍ پر ۵مه نيټه په دوحه کې پيل شي.
افغان حکومت ټينګار کاوه چې د خبرو دا پړاو بايد په هيواد کې وشي، خو طالبانو يې دا وړانديز رد کړی وو.
ولسمشر غني ولې په قطر کې د خبرو له دوام سره موافقه وکړه؟
سره له دې چې د چارو ځيني کتونکي وايي چې د بين الافغاني خبرو د پيل ځای ډير مهم نه دی، خو د حکومت ځيني منتقدين بيا له خپل وړانديزه د ولسمشر تېرېدل بهرنی فشار بولي.
د افغانستان د ولسي جرګې يوه غړي الله ګل مجاهد دويچه ويله ته وويل چې طالبان او افغان حکومت دواړه په مذاکراتو کې د امريکا ارادې ته ګوري: «پر ولسمشر خارجي فشارونه دي، په خاصه توګه د امريکا فشارونه چې ولسمشر غني يې مجبور کړ چې له خپلې غوښتنې تېر شي.»
سياسي شنونکې خاطره اسحاقزۍ هم په دې اند ده چې د سولې په خبرو کې دواړه ښکېل لوري (حکومت او طالبان) لازمه خپلواکي نه لري.
خو نوموړې دويچه ويله ته وويل، د خبرو پر ځای بحث مهم نه دی، بلکې مهم بحث دا دی چې خبرې به په کومه اجنډا دوام وکړي: «مهم ټکي دادي چې کومې پريکړې ته سره رسيږي؟ د افغانانو په استازولۍ هلته څوک ځي؟ افغان ولس بايد په دې خبرو باندې اګاه کړای شي.»
هاخوا ځينې نور کتوونکي په دې باور دي چې د خبرو د ځای په اړه دريځ نېول، د ولسمشر غني يو سياسي تکتيک وو چې غوښتل يې طالبان تر فشار لاندې راولي.
د پوهنتون استاد فضل هادي وزين دويچه ويله ته وويل، داسې ښکاري چې غني په خپل دغه سياسي تکتيک کې پاتې راغلی دی: «دا ښه پرمختګ دی چې بين الافغاني مذاکرات د تېر په څير په دوحه کې کيږي او د خلکو هيله داده څومره چې ژر ممکنه وي دا مذاکرات ښه پايله ولري.»
د افغانستان د ملي روغې جوړې شورا مشر عبدالله عبدالله ويلي دي چې د مذاکراتو دويم پړاو به هم پر ټاکلې نيټه په دوحه کې پيل شي.
ښاغلي عبدالله پر خپله ټويټرپاڼه ليکلي دي چې د شورا د مشرتابه کميټې له غړو سره په غونډه کې دې هوکړې ته رسېدلي دي چې اوسمهال د خبرو دوام له پاره مناسب ځای قطر دی.
اسماعيل شاکر – کابل