آلمان له افغانستانه یوه بله ډله افغانان ایستلي دي
۱۴۰۰ آبان ۲۲, شنبه
د شنبې په ورځ (د ۲۰۲۱م کال د نومبر میاشتې پر ۱۳مه) یوه آلماني خیریه سازمان له افغانستانه یوه بله ډله له خطر سره مخامخ افغانان را ایستلي دي. د معلوماتو له مخې د ۱۴۸ تنو افغانانو دغه ډله نن د شنبې په ورځ د کابل هوايي ډګر له لارې وتلې ده.
د «کابل لوفت بروکه» یا د هوايي پله له لارې له کابله د افغانانو د ایستلو سازمان د یوې خبرپاڼې په خپرولو سره ویلي چې په دغه ډله کسانو کې د آلمان د محلي کارمندانو او نورو له خطر سره مخامخ کسانو سربیره دوه تنه د هوايي ترافیک کنترولونکي هم شامل دي. د خبرپاڼې له مخې د هوايي ترافیک د مدیریت دواړو افغان کارمندانو په افغانستان کې له آلماني پوځ سره کار کړی دی. زیاته شوې چې په دې ډله کې یوه آلمانۍ کورنۍ هم شامله ده.
د «کابل لوفت بروکه» په نامه د دغه سازمان په خبرپاڼه کې همدا راز راغلي چې دغه ډله کسان د کابل هوايي ډګر له لارې نن د شنبې په ورځ د پاکستان اسلام آباد ته رسیدلي دي. دغه چارتر یا ځانګړی پرواز د چندو په واسطه تمویل شوی او د خپل ډول لومړنی پرواز شمیرل کیږي.
دغه آلماني سازمان په ورته وخت کې د آلمان پر حکومت انتقاد کوي او وايي چې آلمان د افغانستان تر سقوط وروسته د خپلو محلي کارمندانو د اخراج په برخه کې ډیر ورو کار کړی دی. دغه سازمان ویلي چې پر آلمان باندې د مخ پر ډیریدونکي ټولنیز فشار په پایله کې دغه هیواد توانیدلی چې له افغانستان د آلماني سرتیرو تر راوتلو وروسته، یوازې یو داسې پرواز تنظیم کړي چې پرمټ یې آلمان ته افغانان را انتقال شوي وي.
د روان میلادي کال د اګست میاشتې په نیمايي کې هغه مهال چې د افغانستان پخوانی حکومت وپرځید او طالبان واک ته ورسیدل، له افغانستانه لسګونه زره له خطر سره مخامخ افغانان د مختلفو هیوادونو له لارې ایستل شوي دي او لا هم ګڼ شمیر نور په دغه هیواد کې پاتې دي او د وتلو په تمه دي.
له کابل څخه د تخلیې تر جنجالي پروسې وروسته، له دغه جګړه ځپلي هیواده د افغانانو د رایستلو پروسه ورو شوې ده. په عین وخت کې د همدې تیرې چهارشنبې په ورځ د آلمان حکومت وویل چې د ۳۲۹ کسانو یوه ډله چې پکې آلماني اتباع هم شامل دي، له افغانستانه د یوې چارتر الوتکې په واسطه ایستل شوي دي.
د دې ټولو باوجود، په افغانستان کې د تیرو دوو لسیزو په ترڅ کې د آلماني پوځ سربیره ګڼ شمیر افغانانو له بهرنیو ځواکونو سره کار کړی دی چې اوس ځانونه په افغانستان کې خوندي نه احساسوي او له دې هیواده د وتلو په هڅه کې دي. د طالبانو د ګواښونو سربیره، په افغانستان کې د غچ اخيستنې له کبله وژنې او چاودنې لا هم ادامه لري او د دوامداره وچکالیو له کبله دغه هیواد د خوړو له کمښت سره مخامخ دی. د دې سربیره، د طالبانو تر راتګ وروسته، افغانستان له اقتصادي ستونزو سره هم مخامخ دی او د دې هیواد په میلیاردونو مالي ذخیري د امریکا متحده ایالاتو له لوري کنګل شوي دي.