بالاخره د آلمان صدراعظمه هم په خپل نوبت سره واکسین شوه
۱۴۰۰ فروردین ۲۸, شنبه
د آلمان صدراعظمې ته د آسترا زینکا واکسین تطبیق شو. په آلمان کې دغه واکسین تر ۶۰ کلونو د پورته عمر لرونکو کسانو له پاره په پام کې نیول شوی دی.
میرکل وویل: «خوښه یم چې نن مې د آسترازینکا واکسین خپل لومړی خوراک (دوز) ترلاسه کړ. زه د ټولو هغو کسانو چې د واکسین کولو په برخه کې فعالیت کوي او هغو کسانو چې واکسین کیږي څخه مننه کوم. واکسین کیدل پر کرونا وبا د برلاسه کیدو کيلي ده.»
د نړۍ د یو شمیر نورو مشرانو برخلاف د آلمان صدراعظمې د کرونا ضد واکسین ترلاسه کولو پر مهال ځان ښکاره نه کړ. د میرکل ویاند شټیفن زایبرت، په خپل تویتر کې د صدراعظمې د واکسین کیدو د تصدیق یا کارت د یوه ساده انځور په خپرولو سره د میرکل د واکسین کیدو اعلان وکړ.
دا په داسې حال کې ده چې د رابرت کُخ انستیتوت نن د شنبې په ورځ په تیرو ۲۴ ساعتونو کې د دغه هیواد په کچه پر کرونا ویروس د نویو اخته شوو کسانو شمیر ۲۳۸۰۴ او له کووید۱۹ سره په ارتباط کې د ۲۱۹ کسانو د مړه کیدو خبر ورکړی دی. له دې سره په مجموع کې په آلمان کې د کرونا ویروس له امله د مړو شویو کسانو شمیر ۷۹۸۴۷ ته ورسید. په مجموع کې تر اوسه پورې په آلمان کې تر ۳ میلیونه او ۱۲۳ زرو ډير انسانان پر کرونا ویروس اخته شوي دي.
آرشیف: د میرکل د سیاسي ژوند په اړه معلومات په دې انځوریز رپوټ کې لوستلی شئ: