بایدن تر معايناتو وروسته د «دندې له پاره وړ» بلل شوی
۱۴۰۱ بهمن ۲۸, جمعه
د امريکا متحده ایالاتو ولسمشر جو بایدن د پنجشنبې په ورځ تر درې ساعته معایناتو وروسته د ډاکترانو له خوا د «دندې له پاره مناسب» اعلان شو.
د دې معايناتو نتايجو ته له دې کبله په ډېر شدت سره انتظار کيده چې اتيا کلن بايدن د ولسمشرۍ د ممکنه دويمې دورې له پاره په ۲۰۲۴م کال کې د ولسمشرۍ په ټاکنو کې د احتمالي ګډون له پاره چمتووالی پېل کړی دی.
د بایدن ډاکترانو څه ويلي؟
د ميري لند په «والتر ريد» ملي پوځي روغتيايي مرکز کې د هر اړخیزو معايناتو په ترڅ کې ځيني نسبتاً کوچني شيان موندل شوي دي. په دې کې د نوموړي په سينه کې د موجود يوه معمولي زخم يا کوچنۍ دانې ايستل شامل دي. خو ډاکترانو هغه د سږو د هر ډول ناروغيو له علايمو پاک اعلان کړی دی، په داسې حال کې چې نوموړی تېر کال دوه ځلي په کرونا اخته شوی وو.
اړونده موضوع:رسنۍ: د بایدن په دفتر کي نور سري اسناد پیدا سوي
د سپينې ماڼۍ له خوا په خپاره شوي يوه ليک کې د بايدن د ډاکتر کيون له قوله راغلي: «ولسمشر جو بايدن يو روغ او قوي اتيا کلن سړی دی چې د ولسمشرۍ دندو په برياليتوب سره سرته رسولو له پاره مناسب دی. په دې دندو کې د اجرايوي رئيس ترڅنګ د دولت د مشر او د پوځ د مشر په توګه دندې هم شاملې دي.»
ډاکتر یې زياته کړې: «ولسمشر د دندې له پاره په بشپړه توګه وړ دی او بې له کومې ستونزې ټولې دندې سرته رسولی شي.»
ډاکتر دا هم ويلي دي چې بايدن د هر ډول جدي عصبی ستونزو لکه «فلج، ام اس، پارکنسون او يا د ليترل سکلیروس ناروغيو» څخه پاک دی.
بايدن او د دويم دورې له پاره احتمالي نوماندي
جو بايدن د امريکا د ولسمشر په توګه دنده ترسره کوونکی تر ټولو سپين ږيری کس دی. تېره اوونۍ له پي بي اس سره د يوې مرکې په ترڅ کې نوموړي ويلي ول چې هر څوک چې د خپل سن په اړه اندېښمن وي هغه دې وګوري چې زه ولسمشر يم.
خو د يو شمير نظرپوښتنو نتايج ښيي چې رايه ورکوونکي داسې انديښنې هم لري چې که چېرې هغه د دويمې دورې له پاره وټاکل شي نو نور څلور کاله به پر دې څوکۍ پاته شي او که نه. د دويمې دورې د پای پر وخت به هغه ۸۶ کلن وي، کوم چې په امریکا کې د نارينه وو د اوسط عمر څخه ۱۳ کاله زيات عمر دی.
ب. ص/ ن. ز (AFP, AP, Reuters)
زموږ له آرشيف څخه: