بنګله دیش: د کښتۍ ډوبیدو پيښه کې۲۵ هندو زیارت کوونکي مړه شوي
۱۴۰۱ مهر ۴, دوشنبه
دغه پيښه د یکشنبې په ورځ (د سپټمبر میاشتې ۲۵ نیټه) د بنګله دیش بوډا کلي ته نږدې د کارټوا په نهر یا سند کې رامنځته شوه. په کښتۍ کې تر ګنجایش ډیر کسان سپاره ول. دوی د هندوانو په مهالیه مراسمو کې د ګډون له پاره یوه مندر ته د عبادت په خاطر روان ول.
د شمالي پنچ ګړ ولسوال ظهور الاسلام ویلي دي چې تر اوسه پورې د ۱۲ میرمنو او ۸ ماشومانو په ګډون ۲۵ مړي موندل شوي دي. هغه زیاته کړې ده چې د ژغورنې عملیات او په قربانیانو پسې لټون روان دی. هغه ویلي چې د لادرکه کسانو دقیق شمیر نه دی معلوم خو په کښتۍ کې د ژغورل شوو کسانو په وینا تر ۷۰ ډير مسافر په کې سپاره ول.
د یو شمیر اطلاعاتو پر بنسټ په کښتۍ کې نږدې ۱۰۰ تنه سپاره ول. یوه لوړپوړي پولیس افسر د ای اف پي خبري آژانس ته ویلي دي چې یو شمیر کسان د لامبو وهلو په مرسته توانیدلي دي چې ځانونه ساحل ته ورسوي.
بنګله دېش کې اورلګېدنې په لسونو تنه وژلي او په سوونو ټپيان کړي
په بنګله دیش کې هر کال د کښتۍ په حادثاتو کې په سلګونو انسانان خپل ژوند له لاسه ورکوي. په تیر دسمبر کې په یوې څو پوړیزې کښتۍ کې د اور لګیدنې په پيښه کې ۴۰ کسانو خپل ژوند له لاسه وکړی و.
کارپوهان وايي چې ډیري وختونه د نیمګړو حفاظتي مقراراتو او کښتیو د خراب وضعیت له کبله دا ډول پيښې رامنځته کیږي.
آژانسونه: ش.ن/ ب. ص