د آسترازینکا واکسین ته بیرته اجازه ورکړل سوه
۱۳۹۹ اسفند ۲۹, جمعه
په امستردام کي د اروپا د دوا جوړولو آژانس (EMA) د پنجشنبې په ماښام تر یوې اضطراري جلسې او خپلي نوي ارزیابۍ وروسته د آسترا زینکا د واکسین معافیت یو وار بیا تایید کړ، خو په دې ټینګار سره چي شاید هغه د ویني د لخته کیدو خطر هم رامنځته کړي.
د نوموړي واکسین د معافیت ارزیابي هغه وخت نوموړي آژانس پرغاړه واخیسته چي ددغه واکسین تر لګولو وروسته د ویني د لخته کیدو په هکله ډیر رپوټونه خپاره سول. په جرمني کي د هغو یو میلیون او ۶۰۰ زرو کسانو څخه چي د آسترازینکا واکسین یې لګولی، د یوې ښځي په شمول ۱۳ کسان چي عمرونه یې د ۲۰ او ۶۳ کلنو ترمنځ وه، د داسي عوارضو سره مخامخ سول چي له کبله یې درو تنو خپل ژوند له لاسه ورکړ.
د دغوعواقبو په دوام د جرمني حکومت د پاول ارلیش واکسیناسیون د تحقیقاتي انستیتوت په سپارښتنه دغه واکسین بند کړ. اوس د اروپا د درمل جوړولو آژانس په سپارښتنه سره د جرمني حکومت او مختلف ایالتونه په دې اړه نور ګامونه هم ترڅیړني لاندي نیسي.
د دغه آژانس رئیس، امر کوکه ویلي دي: «دغه معافیتي واکسین د کرونا ویروس پرضد دی او تر تاوان یې ګټه ډیره ده.»
د دوشنبې په ورځ کله چي په فرانسه او ایټالیا کي د آسترازینکا پر واکسین باندي بندیز ولګول سو، جرمني هم تر بلي خبرتیا پوري ددغه واکسین تطبیقول متوقف کړ. د جرمني د صحت عامې وزیر ینس شپان وویل، چي که څه هم د مغزو په رګونو کي د وینو د لخته کیدو پیښي ډیري لږ وې، خو بیا هم تر لا دقیقو علمي تحقیقاتو پوري باید انتظار وایستل سي.
اوس د اروپا د دوا جوړولو آژانس لخوا تر بیرته تایید وروسته ځینو اروپايي هیوادونو ددغه واکسین تطبیقول له سره پیل کړل.
د جرمني د روغتيا وزير ینس شپان پرون پنجشنبه ماښام (د مارچ میاشتي ۱۸)اعلان وکړ چي د راتلونکي دوشنبې ورځي څخه به د دغه واکسین د بندیدیو اعلان لغوه سي، خو د نن جمعې څخه لا کیدای سي د هغه لګول بیرته شروع سي.