افغان کوماندو د طالبانو له زندانه ۱۳ بنديان آزاد کړي
۱۳۹۹ دی ۲۵, پنجشنبه
اعلان
د افغانستان د دفاع وزارت د پنجشنبې په ورځ (۲۰۲۱م کال د جنورۍ ۱۴مه) ويلي دي چي کوماندو ځواکونه يې د يو لړ عملياتو په ترڅ کي په دې توانېدلي دي چي د هلمند ولايت په واشير ولسوالۍ کي د طالبانو له يوه زندانه ۱۳ کسان آزاد کړي دي چي يو پکښې پوليس دی.
دغه وزارت ويلي دي چي ياد کسان د هغو عملياتو په ترڅ کي آزاد سوي دي چي تيره شپه ترسره سوي دي. وزارت په دې اړه څه نه دي ويلي چي دغه کسان څو موده له طالبانو سره بنديان ول.
د دفاع وزارت په حواله په دغو عملياتو کي يو کرولا موتر، درې موترسايکلونه او درې مخابرې هم نيول سوي دي.
د ۲۰۲۰م کال په اکتوبر مياشت کي وسله والو طالبانو د هلمند ولايت پر مرکز لښکرگاه باندي له څو اړخونو بريدونه وکړل چي په ترڅ کي يې په لسونو زره هلمنديان له خپلو کورونو څخه تېښتي ته مجبوره سول.