د آلمان کولن ښار په لوډسپيکر کې د آذان امتحاني پروژه پیلوي
۱۴۰۰ مهر ۱۶, جمعه
د آلمان د کولن ښار چارواکو ویلي دي چې جوماتونه د دوی د غوښتنې پر اساس او د شرایطو په مراعاتولو سره کولی شي د جمعې د لمانځه آذان په لوډسپیکرونو کې وکړي.
دغه اذان ته د غرمې له ۱۲ څخه د ماسپښین تر ۳ بجو پورې حد اکثر د پنځو دقیقو له پاره اجازه ورکړل شوې ده. د لوډسپيکر له لارې د غږ لوړوالی باید د جوماتونو د موقعیت پر اساس تنظیم شي.
ویل شوي دي مخکې تر دې باید د جوماتونو شاوخوا سیمو ته د معلوماتي پاڼو په وسیله د اذان په هکله خبر ورکړل شوی وي. سربیره پر دې هر جومات یا مسجد باید د اړونده پوښتنو د ځوابولو له پاره یو کس معرفي کړي.
د کولن ښارواله هنريته ریکر، چې یوه غیر ګوندي سیاستواله ده وویل: «خوشحاله یم چې له دې امتحاني پروژې سره په دې تنوع منونکي ښار[کولن] کې د مسلمانو ښځو او نارينه و مذهبي او مشروع علایق په نظر کې نیسو.» د هغې په وینا دا د مقابل دین او مذهب د آزادۍ منلو نخښه ده چې په اساسي قانون کې تضمین شوې ده.
د «کی ان ای» خبري آژانس د رپوټ پر بنسټ دغه آزمایشي پروژه به د ښاري ادارې له خوا په دقیق ډول تر نظارت لاندې وي.
په پام کې ده چې وروسته له دوو کلونو څخه به د کولن ښار چارواکي د جوماتونو له ټولنو سره په ګډه د دې دوه کلنۍ پروژې په اړه خپلې تجربې شریکې کړي او بیا به پریکړه وکړي چې آیا په راتلونکي کې هم دې کار ته دوام ورکړي او که څنګه؟
آژانسونه: ش.ن/ ن.ز