د جرمني د بایرن ایالت اضطراري حالت اعلان کړ
۱۳۹۸ اسفند ۲۶, دوشنبه
ددې لپاره چي د کرونا د ویروس د پراخیدو مخنیوی سوی وي، د بایرن په ایالت کي به ورځنی ژوند د سختو محدودیتونو سره مخامخ سي. په همدې خاطر د نن دوشنبه (د مارچ میاشتي ۱۶مه) څخه هلته اضطراري حالت اعلان سوی دی.
د بایرن ایالتي صدراعظم، مارکوس زویدر په مونشن کي وویل: «خبره د وخت پر سپمیدو باندي ده، یوازي د وخت. او ددې لپاره چي ژر تصامیم ونیول سي، مجبوره یو د جروبحثونو وخت راکم کړو.»
مارکوس زویدر د اضطراري حالت د اعلانیدو دلیل دا حقیت وباله، چي د بایرن په ایالت کي د کرونا ویروس (کووید ۱۹) ډیر زیات د پراخیدو په حال کی دی. او ددې لپاره، چي د هغه سرعت بیرته راکم کړو، باید اجتماعي ارتباطات تر ډیره حده پوري راکم او په عامه ژوندانه کي محدودیتونه وضع کړو.
مارکوس زویدر اضافه کړه، چي د کرونا د بحران عواقب د ۲۰۰۸ م کال تر اقتصادي بحران هم خطرناکه دي . ځکه یې نو د اقتصادي رکود د نه رامنځته کیدو په سبب د ۱۰ ملیارډو یورو یوه کومکي بسته په تصویب رسولې ده. دا به نو اوس د ټولو هغو شرکتونو، اشخاصو او افرادو سره کومک وکړي، چي د کرونا د بحران په سبب متضرر سوي دي.
د اضطراري حالت په اعلانیدو سره د نن دوشنبه څخه په دغه ایالت کي ټوله مکتبونه او وړکتونونه تړلي پاتیږي. پر دې سربیره به سر د سبا سه شنبه ورځي (د مارچ میاشتي ۱۷مه) څخه ټوله میخانې، رستورانونه، سینماوي، د لامبو حوضونه، سپورټي مرکزونه او د کوچنیانو د ساعت تیري ځایونه تړلي پاته سي.
د بل سبا چارشنبې څخه به هغه دوکانونه او مغازې هم تړلي پاته سي، چي خوراکي مواد نه عرضه کوي. د کارځایونو او ادارو کانتینونه به هم یوازي د سهار د ۶ څخه د ماپښین تر ۳ بجو پوري خلاص پاته سي او د میزونو ترمنځ باید ډیره فاصله پریږدي. طبعأ خلک کولای سي، د غذايي موادو فرمایش ورکړي او کورونو ته یې ورغواوړي.